मिष्टर काठमाडौं शारीरिक सुगठन भदौमा

काठमाडौं । मिष्टर काठमाडौं शारीरिक सुगठन, महिला एथलेटिक्स फिजिक्स, जुनियर मिस्टर काठमाडौं शारीरिक सुगठन तथा पुरुष स्पोर्ट्स फिजिक्स प्रतियोगिता भदौमा आयोजना हुने भएको छ ।

काठमाडौं जिल्ला शारीरिक सुगठन तथा फिटनेस संघले शुक्रबार पत्रकार सम्मेलन गर्दै राष्ट्रिय स्तरको प्रतियोगिता भदौ २० र २१ गते हुने जानकारी गराएको छ । 

नेपाल शारीरिक सुगठन तथा फिटनेस संघको सहयोगमा हुने प्रतियोगितामा १३० बढी खेलाडीले प्रतिस्पर्धा गर्ने संघका अध्यक्ष सुरेश सुवेदीले जानकारी दिए ।

प्रतियोगिता अन्तर्गत मिस्टर काठमाडौं प्रतियोगितामा ५५, ६०, ६५, ७०, ७५ र ७५ केजीमाथि गरि कुल ६ तौल समूहमा प्रतिस्पर्धा हुनेछ ।

प्रतियोगिताको पहिलो दिन आज प्रिजजिङ्ग राउण्डबाट प्रत्येक वजन समूहका खेलाडीबिच प्रतिस्पर्धा गराई ५ जना खेलाडीलाई फाईनल चरणमा छनौट गरिने छ । जसमा पहिलो,दोस्रो तथा तेस्रो हुने खेलाडीलाई पदक प्रमाण पत्रका साथै नगद १५, १० र ५ हजार प्रदान गरिने छ । 

मिस्टर काठमाडौंमा समूहगत विजेता खेलाडीहरुबीच पुन प्रतिस्पर्धा गराएर समग्रमा पहिलो हुने खेलाडीलाई ‘मिष्टर काठमाडौं’ को उपाधि प्रदान गरिनेछ । उपाधिसंगै मिष्टर काठमाडौंले १ लाख ५० हजार नगद, ट्रफी र ब्यानेट प्राप्त गर्नेछ । 

यस्तै, महिलातर्फ खुल्ला उचाई अन्तर्गत प्रतिस्पर्धा गराईने छ ।  महिलातर्फ फाइनल चरणमा छनोट भएका ५ महिला खेलाडीबीच प्रतिस्पर्धा गराई समग्रमा पहिलो हुनेलाई महिला एथलेटिक्स फिजिक्सको उपाधिसंगै ३० हजार, ट्रफी र ब्यानेट पाउने छन् । दोस्रोले १५ र तेस्रो ५ हजार पाउनेछन् । 

पुरुष जुनियरतर्फ २०७५ चैत मसान्तसम्म २१ वर्ष ननाघेका खेलाडीले प्रतिस्पर्धा गर्ने छन् । जुनियरतर्फ प्रिजजिङ राउण्डबाट ५ जना खेलाडी फाईनल चरणकोलागि छनोट गरिने छ । पुरुष फिजिक्समा १७० सेमीसम्म र १७० सेमी माथि उचाई समूहमा प्रतिस्पर्धा गराईने आयोजकले जनाएको छ ।

फाइनल चरणमा छनोट भएका पुरुष जुनियर र पुरुष स्पोर्ट्स फिजिक्स मध्येबाट प्रतिस्पर्धा गराई समूहगत पहिलो हुनेलाई उपाधिसंगै नगद ३० हजार,ट्रफी तथा ब्यानेटले सुसज्जित गरिनेछ । यस्तै दोस्रोले १५ हजार र तेस्रोले ५ हजार पाउने छन् ।

खुल्ला प्रतियोगिता रहेको कारण प्रतियोगितामा राष्ट्रिय तथा अन्तराष्ट्रिय क्षेत्रमा पदक जितेका खेलाडीले पनि खेल्न पाउने छन्  । तर, एकै वजन समूह एक क्लब वा संस्थाबाट मात्र २ जना खेलाडीले प्रतिस्पर्धा गर्न पाउने छन् ।