पुन : एन्फा कार्यसमिति बैठक आह्वान !

काठमाडौं । अलिख नेपाल फुटबल संघ एन्फाले पुन कार्यसमितिको बैठक बोलाएको छ । फिफा कंग्रेस लगायतका बिषयमा छलफल गर्न भन्दै एन्फाले जेठ १७ गते कार्यसमिति बैठक बोलाएको हो ।

वरिष्ठ उपाध्यक्ष सहित एजेण्डामा छलफल गर्न गत मंगलबार कार्यसमिति बैठक बसालेको एन्फाले एक दिन नबित्दै पुन नयाँ एजेण्डा सहित कार्यसमितिको बैठक आह्वान गरेको छ ।

यस पटक एन्फाले १७ दिन समय राख्दै कार्यसमिति बैठक आह्वान गरेको हो ।

गत मंगलबारको बैठक विधान सम्मत नभएको कारण देखाउँदै उपाध्यक्ष वीरबहादुर खड्का सहित तीन कार्यसमिति सदस्यले एन्फा वहिष्कार गरेका थिए ।

एन्फा विधान अनुसार कार्यसमिति बैठक आह्वान गर्न कम्तिमा १४ दिन अवश्यक रहेको भन्दै उपाध्यक्ष खड्का सहित पुर्णमान श्रेष्ठ र रत्न श्रेष्ठले बैठक बहिष्कार गरेका थिए ।

उनीहरुले अवैधानिक बैठकले गरेका निर्णय मान्य नहुने भन्दै माइन्युट पुस्तिकामा हस्ताक्षर गर्न समेत अस्विकार गरेका थिए ।

तर एन्फा नेतृत्वले भने संशोधित विधान अनुसार कम्तिमा ७ दिनको समय राखेर बैठक राखेको जिकिर गर्दै आएको छ । साधारण सभाबाट पारित भएको विधानलाई फिफा र एएफसीले समेत पारित गरेको अवस्थामा कार्यसमिति बैठक विधान सम्मत भएको नेतृत्वको जिकिर छ ।

तर खड्का लगायतका केन्द्रिय सदस्यले राखेपको छाप नभएको विधान आफुलाई मान्य नहुने भन्दै बैठकको वैधानिकताको प्रश्न उठाएका थिए ।

खड्काले कार्यसमिति बैठक र वरिष्ठ उपाध्यक्षको निर्णय विधान सम्मत नभएको भन्दै पत्रकार सम्मेलन गरेर विरोध गर्ने चेतावनी नेतृत्वलाई दिएका थिए ।

‘लन्च मिटिङ’को सहमती

कार्यसमिति बैठक बहिष्कार गरेका खड्काले एन्फा नेतृत्वसामु वैधानिकताको प्रश्नमात्र उठाएनन् फिफा कंग्रेसमा जान नाम सिफारिस भएर टिकट समेत आएको अवस्थामा नैतिकताका आधारमा नजाने घोषणा समेत गरेका थिए ।

लगत्तै भोली पल्ट (बुधबार) असन्तुष्ट पक्षसंग एन्फा अध्यक्ष कर्माछिरिङ शेर्पा सहितका पदाधिकारीले छलफल गरेका थिए । बिहानै लन्च मिटिङमा भेला भएका दुवै पक्ष मिलेर अगाडी बढ्ने सहमती गरेका थिए ।

तर दुवै पक्षले सहमतीलाई आ-आफ्नो ढङ्गले प्रस्तुत गरेका छन् ।

बैठकमा पुरानै विधान अनुसार कम्तिमा १४ दिनको समय राखेर कार्यसमिति बैठक बोलाउने र पुराना निर्णयलाई अनुमोदन गर्ने सहमती भएको उपाध्यक्ष खड्काको दाबी छ ।

‘हामीले अध्यक्षलाई विधानसम्मत बैठक भएन भनेर विरोध गरेका थियौ । सोही अनुसार आजै (बुधबार) नयाँ कार्यसमितिको बैठक बोलाउने सहमती भएको छ । विविध शीर्षकको एजेण्डामा राखेर भएपनि वरिष्ठ उपाध्यक्ष सहितको पुरानो निर्णयलाई अनुमोदन गराउनुपर्ने सहमती हो ।’ उनले भने ।

तर एन्फा प्रवक्ता किरण राई नयाँ विधान अनुसार जेठ १७ गतेको बैठक बोलाईएको दाबी गरे ।

‘कार्यसमितिले आवश्यक परेको अवस्थामा कुनै पनि बेला बैठक आह्वान गर्न सक्छ । सोही अनुसार १७ गते बैठक बोलाईएको हो । अघिल्लो बैठकको निर्णय र नयाँ बोलाईएको बैठक फरक बिषय हो ।’ उनले खेलपाटीसंग भने ।

आगामी जेठ १७ गते बोलाईएको कार्यसमिति बैठकका एजेण्डा निम्न प्रकार रहेको छन् ।

१. १६ औ फिफा कंग्रेसका सम्बन्धमा

२. राष्ट्रिय लिग र सहिद स्मारक लिग सम्बन्धमा

३. प्रदेश लिग तथा एन्फा प्रेसिडेन्ट कप सञ्चालन समिति गठन सम्बन्धमा ।