काठमाडौं । नेपाल जुडो संघले अन्तराष्ट्रिय खेलाडी रमेश मगरलाई १० बर्षको प्रतिबन्ध लगाएको छ । सागका पदकधारी खेलाडी मगरलाई जुडो संघले जुडो सम्बन्धी कुनैपनि कार्यक्रममा सहभागि हुन नपाउने गरि १० बर्षको प्रतिबन्ध लगाएको हो ।
प्रशिक्षण कोर्सको प्रयोगात्मक परिक्षा दिन हङ्गेरी प्रस्थान गरेका उनी बिदेशमा लुकेको पुष्टि भएपछि संघले उनलाई कारबाही स्वरुप प्रतिबन्ध लगाएको हो ।
आईजेएफ एकेडेमी लेवल वानको ११ हप्ताको सैद्वान्तिक परिक्षामा सहभागि भएर उत्तीण भएका उनी प्रयोगात्मक परिक्षामा सहभागि हुन हङ्गेरी जाने क्रममा फ्रान्समा लुकेका थिए ।
सन् २०१९ मा अप्रल १४ गते हङ्गेरी उडेका उनी सम्पर्क विहिन भएका थिए । अन्तराष्ट्रिय जुडो महासंघले समेत मगर निर्धारित स्थानमा नपुगेको भन्दै नेपाल जुडो संघको ध्यानकर्षण गराएको थियो ।
अनुसन्धानको क्रममा उनी फ्रान्समा लुकेर बसेको पत्ता लागेपछि उनलाई प्रतिबन्ध लगाउने निर्णय गरिएको संघका अध्यक्ष दिपकहर्ष बज्राचार्यले खेलपाटीलाई बताए ।
मगरको गतिविधिले देशको छवि र जुडो संघको प्रतिष्ठामा आँच पुर्याउने काम गरेको भन्दै उनलाई प्रतिबन्ध लगाईएको संघको भनाई छ ।
जुडोका अन्तराष्ट्रिय खेलाडी रमेशले भारतमा भएको १२ औ दक्षिण एसियाली खेलकुद सागमा काँस्य जितेका थिए । त्यस अघि उनले बंगलादेशमा भएको सागमा समेत पदक जितेका थिए । खेलाडीसंगै पछिल्लो समय प्रशिक्षकमा समेत अब्बल सावित गर्दै आएका उनी लेवल वान कोर्स गर्न हङ्गेरी उडेका थिए ।
यस्तै, संघले कुनैपनि जानकारी नगराई जापान प्रशिक्षणबाट फर्किएकी फुपुलामु खत्रीलाई टोकियो ओलम्पिक सम्मका लागि निलम्बन गरेको छ ।
बिना सुचना प्रशिक्षण छाडेर स्वदेश फर्किएको र कार्यक्रम अवधिभर जापानमा प्रशिक्षणमा रहेको बेलाको रिपोर्टका आधारमा उनलाई निलम्बन गरिएको संघले जनाएको छ ।
-1750070144.JPG)
-1750064258.webp)
