ओजिलले पठाए नेपाली समर्थकलाई जर्सी

काठमाडौं । इङ्लिस क्लब आर्सनलका स्टार मेसुट ओजिलले आफ्ना समर्थकलाई पठाईदिएको जर्सी नेपाल आइपुगेको छ ।

आर्सनलका नेपाली समर्थकलाई मायाको चिनो स्वरुप ओजिलले आफ्नो अटोग्राफ सहितको जर्सी नेपाल पठाएका थिए । उनले मार्च ३१ मा पठाएको जर्सी सोमबार नेपाल आईपुगेको हो ।

गत मार्च २३ मा आर्सनलको आधिकारिक समर्थकको संस्था आर्सनल नेपालले ओजिलको गोलको सेलिब्रेसन संकेतमा काठमाडौंको बौद्धमा सामुहिक तस्बिर खिचाएका थिए ।

सो फोटो ओजिलले आफ्नो सामाजिक संजालमा सार्वजनिक गर्दै नेपली समर्थकलाई धन्यबाद ज्ञापन समेत गरेका थिए ।

ओजिलले हालसम्म बिभिन्न देशका समर्थकलाई आफ्नो जर्सीमा अटोग्राफ गर्दै मायाको चिनो स्वरुप पठाउदै आएका छन् । सोहि क्रममा उनले नेपाली समर्थकलाई समेत उपहार स्वरुप जर्सी पठाएका हुन् ।

केही दिनमा ओजिलले पठाएको सो जर्सी सार्वजनीक गरिने बताईएको छ ।