बक्सिङको रेफ्री रिफ्रेसर तालिम सम्पन्न

पोखरा । बक्सिङ खेलको रेफ्री र निर्णायकहरुका लागि तीन दिने राष्ट्रिय बक्सिङ रेफ्री रिफ्रेसर प्रशिक्षण सम्पन्न भएको छ । नेपाल बक्सिङ आयोजनामा पोखरामा मंगलबारबाट प्रशिक्षण सकिएको हो ।

तालिममा देशभरका ३९ जना बक्सिङका रेफ्री र निर्णायकहरुले सहभागिता जनाएका थिए । तालिममा आईबाका आई टि ओ एक्सपर्ट एवम् आईबा टेक्निकल एण्ड रुल्स कमिसशनका सदस्य भारतका थ्री स्टार रेफ्री किशेन नारसीले प्रशिक्षण दिएका थिए ।

सन १९५६ मा बक्सिङ खेल शुरु गरेका नारसीले ६ वटा ओलम्पिक गेममा र आठवटा एशियन गेम्समा रेफ्री जजको भुमिका निर्वाह गर्दै १५ वर्ष देखि आईबा टेक्निकल एन्ड रुल्स कमिशनमा कार्य गरी सकेका छन् ।

कार्यक्रममा आठौं राष्ट्रिय खेलकुदको लागी प्रदेश ३ र ४ को लागि प्रदेशस्तरीय छनौट खेलका क्रममा प्रयोगात्मक प्रशिक्षण दिइएको थियो । सहभागीहरुलाई उक्त प्रशिक्षणको प्रमाणपत्र प्रदान गर्दै नारसीले नेपाली आरजेहरुको प्रसंसा गर्दै नेपाली महिला बक्सिङ खेलाडीहरु पनि अन्तराष्ट्रियस्तरमा पदक जित्न सफल भएको र नेपालमा बक्सिङको विकासको राम्रो सम्भावना रहेको बताए ।

समापन समारोहमा नेपाल बक्सिङ संघका अध्यक्ष राम अवालेले सबै रेफ्री जजहरुले राम्रोसंग मेहनेत गर्दै अगाडि बढन र नेपाली बक्सिङलाई अझ उचाँइमा पुर्र्याउन महत्वपुर्ण भुमिका रेफ्रीहरुले निर्वाह गर्नु पर्ने बताए ।

कार्यक्रका प्रमुख अतिथि राखेपका सदस्य एवम् संघका वरिष्ठ उपाध्यक्ष अर्जुन केसीले अनुभवी प्रशिक्षकबाट तालिमप्राप्त गर्ने मौका नेपाली आरजेले पाएको र यस्ता प्रशिक्षणहरु समय समयमा आयोजना गर्नका लागि नेपाल बक्सिङ निरन्तर कटिवद्ध रहने जानकारी गराए ।

कार्यक्रममा बक्सिङका प्रमुख प्रशिक्षक प्रकाश थापामगर, पश्चिमाञ्चल क्षेत्रीय खेलकुद विकास समितिका निर्देसक एवम् बक्सिङका पुर्व प्रमुख प्रशिक्षक विद्या मरासनी, कास्की जिल्ला बक्सिङ संघका अध्यक्ष बुद्ध गुभाजु, नेपाल बक्सिङ संघका सदस्य लक्ष्मण कार्की लगायतको उपस्थिति रहेको थियो ।