भिनिसियसलाई ‘बाँदर’ भनेको आरोपमा प्रेस्टियानीलाई कारबाही

काठमाडौं। युरोपेली फुटबल महासंघ (यूईएफए)ले सोमबार बेन्फिका खेलाडी जियानलुका प्रेस्टियानीलाई एक खेलमा प्रतिबन्ध लगाएको छ। उनीमाथि रियल मड्रिडका खेलाडी भिनिसियस जुनियरलाई जातीय दुर्व्यवहार गरेको आरोप लागेको छ।

यस निर्णयका कारण प्रेस्टियानीले बुधबार हुने च्याम्पियन्स लिग प्लेअफको दोस्रो लेग गुमाउने छन्। पहिलो लेगमा रियल मड्रिडले लिस्बनमा १–० को जित निकालेको थियो। यसमा भिनिसियसले दोस्रो हाफमा निर्णायक गोल गरेका थिए।

भिनिसियसले गोल गरेपछि बेन्फिकाको कर्नर फ्ल्यागतर्फ गएर नाच्दै उत्सव मनाएका थिए। उक्त नाचले घरेलु समर्थक र केही खेलाडीलाई असन्तुष्ट बनाएको थियो। त्यसपछि प्रेस्टियानीले उनीमा केही बोलेको जस्तो सुनिएको थियो। भिनिसियसले प्रेस्टियानीले आफूलाई बाँदर भनेर सम्बोधन गरेको आरोप लगाएका छन्।

प्रेस्टियानीले भने जातीय अपमान नगरेको दाबी गरेका छन्। खेल करिब १० मिनेट रोकिएको थियो र यूईएफएको जातीय विभेदविरुद्धको प्रोटोकल सक्रिय गरिएको थियो।

तर, प्रेस्टियानीले कुरा गर्दा आफ्नो जर्सीले मुख छोपेका कारण ठोस प्रमाण नपाइएकाले तत्काल थप कारबाही गरिएको थिएन। भिनिसियसलाई भने गोल उत्सवका कारण पहेंलो कार्ड देखाइएको थियो।

यूईएफएले आफ्नो नियन्त्रण, नैतिकता तथा अनुशासन निकाय (सीईडीबी) को निर्णय विभेदपूर्ण व्यवहारसँग सम्बन्धित रहेको जनाएको छ। साथै अनुसन्धान सकिएपछि अनुशासन निकायले गर्ने अन्तिम निर्णयमा यसले असर नपार्ने पनि स्पष्ट पारेको छ।

फिफा अध्यक्ष जियानी इन्फान्तिनोले खेलपछि उक्त घटनाले आफू स्तब्ध र दुःखी भएको बताएका थिए। उनले रेफ्रीले जातीय विभेदविरुद्धको प्रोटोकल सक्रिय गरेकोमा प्रशंसासमेत गरेका छन्।

बेन्फिकाले प्रेस्टियानीलाई समर्थन जनाएको छ। क्लबका अनुसार कथित अपमान सुनेको दाबी गर्ने रियल मड्रिडका खेलाडीहरू धेरै टाढा थिए। क्लबले यूईएफएको अनुसन्धानलाई स्वागत गर्दै प्रेस्टियानीको व्यवहार सधैं सबैप्रति सम्मानपूर्ण रहेको बताएको छ।

भिनिसियसले गोल उत्सव मनाउँदा बेन्फिकाका केही समर्थकले बोतल तथा अन्य वस्तु मैदानतर्फ फ्याँकेका थिए। त्यसपछि प्रेस्टियानीले जर्सीले मुख छोपेर भिनिसियससँग केही भनेका थिए।

प्रेस्टियानीले आफ्नो भनाइ गलत बुझिएको दाबी गरेका छन्। बेन्फिकाका केही खेलाडीले पनि उनले उक्साएको भए पनि जातीय अपमान नगरेको बताएका छन्।

रियल मड्रिडका स्टार खेलाडी किलियन एम्बाप्पेले भिनिसियसको खुलेर समर्थन गरेका छन्। उनले सामाजिक सञ्जाल एक्समा ‘नाच भिनी, कहिल्यै नरोकिनु’ भन्दै सन्देश पोस्ट गरेका थिए। साथै उनले प्रेस्टियानीले च्याम्पियन्स लिगमा फेरि खेल्न नपाउने दाबीसमेत गरेका छन्।