फेरि शीर्ष स्थानमा फर्कियो बार्सिलोना

काठमाडौं। तालिकाको पुछारमा रहेको रियल ओभिएदोका दुई गम्भीर रक्षात्मक गल्तीको फाइदा उठाउँदै बार्सिलोना ला लिगाको शीर्ष स्थान पुनः फर्किएको छ।

बार्सिलोनाले आइतबार वर्षाले भिजेको क्याम्प नोउमा ३–० को सहज जित निकालेको हो। डानी ओल्मो, राफिन्हा र लामिन यमलको सानदार गोलमा बार्सिलोनाले तीन अंक जोड्दै ५२ अंक पुर्‍याएको छ। यससँगै बार्सिलोना रियल मड्रिडभन्दा एक अंकले अघि रहेको छ भने एट्लेटिको मड्रिड ४४ अंकसहित तेस्रो स्थानमा छ।

उत्साहजनक खेल देखाएको ओभिएदोविरुद्ध बार्सिलोनाले सुरुआती समयमा गोल गर्न संघर्ष गर्नुपर्‍यो। अन्ततः खेलको ५२औं मिनेटमा ओभिएदोको रक्षात्मक चुकबाट मौका पाउँदै ओल्मोले गोल गरे।

पाँच मिनेटपछि ओभिएदोका डिफेन्डर डाभिड कोस्तासको कमजोर ब्याक पासलाई राफिन्हाले बीचमै काट्दै गोलरक्षक आरोन एस्कान्डेललाई चिप गर्दै दोस्रो गोल गरे। ७३औं मिनेटमा ओल्मोको क्रसमा यमलले हावामै उफ्रँदै कलात्मक सिजर किक प्रहार गर्दै तेस्रो गोल गरे, जसले बार्सिलोनाको जित सुनिश्चित गर्‍यो।

खेलभरि परेको मुसलधारे वर्षा पछि असिनामा परिणत हुँदा खेल कठिन बनेको थियो। कमजोर सिजन खेपिरहेको ओभिएदो (सिजनभरि मात्र दुई जित) ले पनि केही अवसर सिर्जना गरेको थियो।