चेल्सीलाई हराउँदै आर्सनल फाइनलनजिक

काठमाडौं। गोलकिपर रोबर्ट सान्चेजका दुई ठूला गल्तीको फाइदा उठाउँदै आर्सनलले इङ्लिस लिग कप सेमिफाइनलको पहिलो लेगमा चेल्सीलाई ३–२ ले पराजित गरेको छ। बुधबार स्ट्यामफोर्ड ब्रिजमा भएको खेलपछि आर्सनल फाइनलनजिक पुगेको छ।

खेलको सातौं मिनेटमै आर्सनलले अग्रता लियो। कर्नर किक सान्चेजमाथि पार हुँदै गयो र बेन ह्वाइटले खाली पोस्टमा हेडरमार्फत गोल गरे। ४९औं मिनेटमा स्पेनी गोलकिपर सान्चेजले अर्को गल्ती गरे, जसको फाइदा उठाउँदै भिक्टर ग्योकरसले सजिलै ट्याप–इन गोल गरे।

वैकल्पिक खेलाडीका रूपमा मैदान प्रवेश गरेका आलेहान्द्रो गार्नाचोले चेल्सीका लागि गोल फर्काउँदै खेलमा आशा जगाए। तर, ७०औं मिनेटमा मार्टिन जुबिमेन्डीले सुन्दर फिनिस गर्दै आर्सनलको दुई गोलको अग्रता पुनः कायम गरे।

८३औं मिनेटमा गार्नाचोले आफ्नो दोस्रो गोल गर्दै चेल्सीलाई दोस्रो लेगतर्फ आशा दिलाए। दोस्रो लेग फेब्रुअरी ३ मा आर्सनलको घरेलु मैदान एमिरेट्स स्टेडियममा हुनेछ।

यद्यपि समग्र प्रदर्शनका आधारमा आर्सनल मार्च २२ मा वेम्बली स्टेडियममा हुने फाइनल पुग्ने बलियो दाबेदार मानिएको छ। मिकेल आर्टेटाको टोली हाल प्रिमियर लिगमा ६ अंकको अग्रतासहित शीर्ष स्थानमा छ भने च्याम्पियन्स लिग समूह चरणमा पनि शीर्ष स्थानमा रहेको छ।

चेल्सीका नयाँ प्रशिक्षक लियम रोजेनियरका लागि यो पहिलो घरेलु खेल थियो। उनले सान्चेजका गल्तीमाथि आलोचना गर्न अस्वीकार गरे।

‘खेलअघि नै मैले मेरा खेलाडीहरूले गल्ती गरे भने त्यसको जिम्मेवारी म लिन्छु भनेको थिएँ ,’ रोजेनियरले भने, ‘म उसलाई र सम्पूर्ण टोलीलाई सकारात्मक रूपमा साथ दिनेछु। दोषारोपण गर्नु होइन, सहयोग गर्नु नै मेरो काम हो।’