आईसीसीले बंगलादेशलाई भन्यो– विश्वकप खेल्न भारत नै जाऊ, नगए अंक काट्छौं

काठमाडौं। बंगलादेश क्रिकेट बोर्ड (बीसीबी) ले टी–२० विश्वकप खेल्न भारत नजाने निर्णय गरेपछि अन्तर्राष्ट्रिय क्रिकेट परिषद् (आईसीसी) ले वैकल्पिक भेन्यूको अनुरोध अस्वीकार गरेको दाबी गरिएको छ।

ईएसपीएन क्रिकइन्फोका अनुसार मंगलबार (६ जनवरी) भएको भर्चुअल बैठकमा आईसीसीले सुरक्षा कारण देखाउँदै भारतबाहिर बंगलादेशका खेल सार्ने प्रस्ताव मान्य नहुने स्पष्ट पारेको हो।

उक्त रिपोर्टमा भनिएअनुसार आईसीसीले बीसीबीलाई विश्वकप खेल्न भारत आउनै पर्ने, अन्यथा खेल नखेलेको मान्दै बंगलादेशलाई शून्य अंक दिने चेतावनी दिएको छ। त्यस अवस्थामा तालिकाअनुसारका प्रतिद्वन्द्वी टोलीले ती खेलमा पूर्ण दुई अंक पाउनेछन्।

यद्यपि, बीसीबीले यस्तो कुनै चेतावनी प्राप्त नभएको दाबी गरेको छ। बोर्डका अनुसार आईसीसीबाट औपचारिक रूपमा कुनै धम्की वा सन्देश आएको छैन।

मंगलबारको बैठकपछि अहिलेसम्म आईसीसी, बीसीबी वा भारतीय क्रिकेट बोर्ड (बीसीसीआई) कुनै पक्षले पनि औपचारिक विज्ञप्ति जारी गरेका छैनन्। आइतबार बीसीबीले भारतबाहिर बंगलादेशका खेल आयोजना गर्ने विषय ‘विचार गर्न’ अनुरोध गर्दै आईसीसीलाई पत्र पठाएको थियो।

त्यसपछि नै आईसीसीले उक्त बैठकको आयोजना गरेको हो। टी–२० विश्वकप सुरु हुन अझै करिब एक महिना बाँकी छ। २० टोली सहभागी रहने प्रतियोगिता फेब्रुअरी ७ बाट सुरु भई मार्च ८ मा सकिनेछ।

भारत र श्रीलंकाको संयुक्त आयोजनामा हुने यस प्रतियोगितामा बंगलादेश ‘ग्रुप सी’ मा परेको छ। तालिकाअनुसार बंगलादेशले फेब्रुअरी ७, ९ र १४ मा क्रमशः वेस्ट इन्डिज, इटाली र इंग्ल्यान्डसँग कोलकाताको इडेन गार्डेन्समा खेल्नेछ। समूह चरणको अन्तिम खेल फेब्रुअरी १७ मा मुम्बईमा नेपालसँग हुनेछ।

मोस्ताफिजुर रहमानसम्बन्धी विवादपछि बीसीबीले आईसीसीलाई पत्र लेखेको हो। बीसीसीआईले उग्रपन्थीहरूको दबाबमा परेर मोस्ताफिजलाई आईपीएलबाट हटाएको आरोप लागेपछि सुरक्षा सम्बन्धी प्रश्न उठेको थियो।

एक जना बंगलादेशी खेलाडीको सुरक्षा दिन नसक्ने पक्षले सम्पूर्ण टोलीलाई कसरी सुरक्षा दिन्छ भन्ने शंका बीसीबीले उठाएको थियो। यद्यपि, बीसीसीआईले सुरक्षा वा उग्रपन्थीको दबाबको विषय खुलाएर नबताई ‘हालैको परिस्थिती’ को उल्लेख गर्दै कोलकाता नाइट राइडर्सलाई मोस्ताफिजलाई रिलिज गर्न निर्देशन दिएको थियो।

गत डिसेम्बरको आईपीएल अक्सनमा ९ करोड २० लाख भारुमा किनिएका मोस्ताफिज २०२६ सिजनका एकमात्र बंगलादेशी खेलाडी थिए। बीसीसीआईका सचिव देवजित साइकियाले मोस्ताफिजलाई रिलिज गर्न निर्देशन दिएको पुष्टि गरे पनि यसको स्पष्ट कारण सार्वजनिक गरेका छैनन्।

भारतीय सञ्चारमाध्यमका अनुसार यस विषयमा आईपीएल गभर्निङ काउन्सिलको बैठकसमेत बसेको थिएन। त्यसैले उक्त निर्णयमा सचिवबाहेक अरू को–को संलग्न थिए भन्ने प्रश्न पनि उठिरहेको छ।