इन्दुको कप्तानीमा विश्वकप ग्लोबल क्वालिफायर्स खेल्ने टोली घोषणा

काठमाडौं। नेपाल क्रिकेट संघ (क्यान) ले आईसीसी महिला टी–२० विश्वकप २०२६ (इङ्ल्यान्ड तथा वेल्स) का लागि हुने ग्लोबल क्वालिफायर्स खेल्ने नेपाली महिला क्रिकेट टोलीको घोषणा गरेको छ।

घोषित टोलीको कप्तानमा इन्दु बर्मा रहेकी छन् भने पूजा महतो उपकप्तानको जिम्मेवारीमा चयन भएकी छन्। टोलीमा अनुभवी र युवा खेलाडीहरूको सन्तुलित मिश्रण समावेश गरिएको छ।

घोषित खेलाडीहरूमा रुबिना क्षेत्री, सीता रानामगर, बिन्दु रावल, सम्झना खड्का, काजल श्रेष्ठ, कविता जोशी, कविता कुँवर, रचना चौधरी, रिया शर्मा, रोमा थापा, सुमन विष्ट, राजमती ऐरी र मनीषा उपाध्याय रहेका छन्।

आईसीसी महिला टी–२० विश्वकप २०२६ का लागि हुने ग्लोबल क्वालिफायर्स आगामी जनवरी १४ देखि फेब्रुअरी १ सम्म नेपालमै आयोजना हुनेछ। प्रतियोगिताका खेलहरू त्रिवि क्रिकेट मैदान तथा मूलपानी क्रिकेट मैदानमा सञ्चालन हुनेछन्।

घरेलु मैदानमै हुने यो प्रतियोगितामा नेपाली टोलीले विश्वकपमा स्थान बनाउने लक्ष्य बोकेको छ।