ली–निङ बास्केटबल प्रतियोगिता सोमबारदेखि

काठमाडौं। ली–निङ बास्केटबल प्रतियोगिता सोमबारदेखि हुने भएको छ। नेपाल बास्केटबल संघ (नेबा) ले आगामी हिमालयन जाभा नेसनल बास्केटबल लिगका छनोटका लागि यो प्रतियोगिता गर्न लागेको हो।

प्रतियोगिता बौद्धस्थित डंकमाण्डुमा सञ्चालन हुनेछ। प्रतियोगितामा १२ टोलीले सहभागिता जनाउनेछन्। यसबाट आगामी हिमालयन जाभा नेसनल बास्केटबल लिग सिजनका लागि चार टोली छनोट गरिनेछ।

सहभागी टोलीलाई तीन समूहमा विभाजन गरिएको छ। प्रत्येक समूहका शीर्ष दुई टोली क्वार्टरफाइनल चरणमा प्रवेश गर्नेछन्। त्यसपछि प्रतियोगिता सेमिफाइनल हुँदै फाइनल खेलसँगै सम्पन्न हुनेछ।

६ दिनसम्म सञ्चालन हुने यस प्रतियोगिताले उच्चस्तरीय प्रतिस्पर्धा र उत्कृष्ट बास्केटबल प्रतिभा प्रदर्शन गर्ने अपेक्षा गरिएको छ। प्रतियोगिताको आधिकारिक शीर्ष प्रायोजक ली–निङले ग्रासरुट तहदेखि व्यावसायिक स्तरसम्म बास्केटबलको विकास र विस्तारमा सहयोग गर्दै आइरहेको छ।