फाइनलअघि एपीएफलाई ईस्ट बंगालको चुनौती

काठमाडौं। विभागीय टोली एपीएफले साफ महिला क्लब च्याम्पियनसिपको अंक तालिकामा शीर्ष स्थानमा रहन बुधबार भारतीय क्लब ईस्ट बंगाललाई चुनौती प्रस्तुत गर्दैछ। यी दुवै टोली यसअघि नै फाइनलमा पुगिसकेका छन्।

यद्यपि, लिग चरणक अन्तिम खेलमा पुन: भिड्न लागेका हुन्। दशरथ रंगशालामा हुने यो खेल साँझ ६ बजे सुरु हुनेछ। समूह चरणमा ईस्ट बंगाल र एपीएफले अपराजित रहँदै उत्कृष्ट प्रदर्शन गरिरहेका छन्।

तीन खेल खेलेको ईस्ट बंगालले तीनै खेल जित्दै ९ अंकका साथ समूहको शीर्ष स्थानमा रहँदै फाइनलमा स्थान सुरक्षित गर्‍यो। ईस्ट बंगालले समूह चरणमा १३ गोल गरेको थियो भने एक पनि गोल नखाई प्रभावशाली गोल अन्तर बनाएको छ।

एपीएफले पनि समूह चरणमा सशक्त प्रदर्शन गर्दै फाइनल यात्रा तय गर्‍यो। तीन खेलमा दुई जित र एक बराबरीसहित ७ अंक जोड्दै एपीएफ दोस्रो स्थानमा छ। एपीएफले ५ गोल गर्दै एक पनि गोल खाएको छैन।

समूह चरणबाट कराची सिटी, ट्रान्सपोर्ट युनाइटेड र नास्रिन भने क्रमशः तेस्रो, चौथो र पाँचौं स्थानमा रहँदै प्रतियोगिताबाट बाहिरिएका छन्।

यो खेलपछि उपाधिका लागि फाइनलमा ईस्ट बंगाल र एपीएफ आमनेसामने हुनेछन्।