मेसीको कार्यक्रममा अशान्ति, ममतालाई पक्राउ गर्न माग

काठमाडौं। भारतका चार सहरको तीनदिने भ्रमणमा रहेका विश्वप्रसिद्ध फुटबलर लिओनल मेसीको कार्यक्रमको सुरुआत सुखद हुन सकेन।

भ्रमणको पहिलो गन्तव्य कोलकाता थियो। तर, साल्ट लेक स्टेडियममा ठूलो हंगामा मच्चियो।

मेसीसँगै लुइस सुआरेज र रोड्रिगो डे पल स्टेडियम पुग्नेबित्तिकै करिब ७०–८० जना मानिसले उनीहरूलाई घेरे।

मन्त्री र आयोजकहरू क्यामेरा तथा मोबाइल बोकेर फोटो खिच्न व्यस्त हुँदा मेसीलाई हिँड्नसमेत गाह्रो परेको थियो।

सुरक्षा घेराबीच मेसी दर्शकहरूको आँखाबाट ओझेल परे। योसँगै पारापिटमा बसेका दर्शक आक्रोशित बने।

महँगो टिकट काटेर पनि मेसीलाई राम्ररी देख्न नपाएको भन्दै दर्शकहरूले आक्रोश पोख्दै मैदानतर्फ बोतल र कुर्सी फ्याँके।

केही दर्शक बार भत्काएर मैदानभित्र प्रवेश गरे। स्थिति नियन्त्रणमा लिन प्रहरीले लाठीचार्ज गरे पनि अवस्था नियन्त्रण बाहिर गयो।

तनावपूर्ण अवस्थाका कारण निर्धारित समयभन्दा अगावै मेसी स्टेडियम छाड्न बाध्य भए।

मेसीको भारत भ्रमणको आयोजनाको जिम्मा उद्यमी शतद्रु दत्तले लिएका हुन्। उक्त घटनापछि कोलकाता प्रहरीले स्वतः मुद्दा दर्ता गर्दै दत्तलाई विमानस्थलबाट पक्राउ गरेको छ।

पक्राउपछि उनले दर्शकलाई टिकटको पैसा फिर्ता दिने लिखित आश्वासन दिएका छन्।

घटनाप्रति पश्चिम बंगालकी मुख्यमन्त्री ममता बनर्जीले सार्वजनिक रूपमा माफी मागेकी छन्। तर, असमका मुख्यमन्त्री हिमन्त शर्मा बिस्वा सरमाले बनर्जीलाई समेत गिरफ्तारीको माग गरेका छन्।

उनले भनेका छन्, ‘राज्यकी मुख्यमन्त्री स्वयं गृह मन्त्रालयको जिम्मेवारीमा छिन्। यस घटनाको पहिलो जिम्मेवारी उनकै र कोलकाता प्रहरी आयुक्तकै हो।’