पर्थपछि ब्रिसबेनमा पनि अस्ट्रेलियाले इङ्ल्यान्डलाई हरायो

काठमाडौं। पर्थ टेस्टमा दुई दिनमै आत्मसमर्पण गरेको इङ्ल्यान्डले ब्रिसबेनमा पहिलो इनिङ्समा जो रुटको शतकीय इनिङ्ससँगै खेलमा पुनरागमन गर्ने संकेत देखाएको थियो। तर, मिचेल स्टार्कको बलिङपछि ठूलो अग्रता बनाएको अस्ट्रेलियाले इङ्ल्यान्डलाई खेलमा फर्किन नै दिएन।

चौथो दिन केही प्रयास भने कप्तान बेन स्टोक्सको ब्याटबाट देखियो। तर, अन्त्यमा उनको त्यो अर्धशतक पर्याप्त हुन सकेन। स्टिभ स्मिथको नेतृत्वमा रहेको अस्ट्रेलियाले ब्रिसबेनमा सजिलो जित निकाल्दै सिरिजमा २–० को अग्रता बनायो।

ब्रिसबेनको गाबा मैदानमा आइतबार अस्ट्रेलियाले इङ्ल्यान्डलाई ८ विकेटले हराउको हो। चौथो दिन ६५ रनको लक्ष्य अस्ट्रेलियाले मात्र १० ओभरमै २ विकेट गुमाएर लक्ष्य पूरा गर्‍यो। स्टिभ स्मिथले ९ बलमा २३ रन बनाउँदै छिट्टै खेल सकाए।

यसअघि अस्ट्रेलियाले १७७ रनको अग्रता बनाएको थियो। इङ्ल्यान्ड तेस्रो इनिङ्समा ब्याट गर्न आएर ३५ ओभरमा ६ विकेट गुमाएर १३४ रन दिन सक्यो। बेन स्टोक्स र विल ज्याक्स ४–४ रनमा दिन समाप्त गरेका थिए।

चौथो दिन फेरि ब्याट गर्न आएका स्टोक्स–ज्याक्सले राम्रो प्रतिरोध देखाए। तर, माइकल नेसरले ज्याक्सलाई आउट गर्दै ९६ रनको साझेदारी तोडे।

ज्याक्स ९२ बलमा ४ चौका प्रहार गर्दै ४१ रनमा आउट भए। त्यसपछि अर्को ओभरमै स्टोक्सलाई कैरिको क्याचमा आउट गराउँदै इङ्ल्यान्डको हार सुनिश्चित गरे। स्टोक्स १५२ बलमा ४ चौकासहित ५० रनमा आउट भए।

कप्तानको विदाइपछि इङ्ल्यान्डले मात्र १४ रन थपेर बाँकी २ विकेट गुमायो। नेसरले १६.२ ओभरमा ४२ रन मात्र दिएर ५ विकेट लिए। पहिलो इनिङ्समा ६ विकेट लिएका स्टार्कले थप २ विकेट लिए। स्कट बौलैन्डले २ विकेट लिए भने डोगेटले बाँकी विकेट लिए।

६४ रनको लक्ष्य अस्ट्रेलियाले जित्न धेरै समय लिएन। ट्राभिस हेडले २२ बलमा २२ रन बनाए। मार्नुस लाबुसचेने ३ रनमा आउट भए। बाँकी काम ज्याक वादराल्ड र स्मिथले पूरा गरे।

कप्तान स्मिथले नवौं ओभरमा दुई चौका र एक छक्का प्रहार गरे। १०औं ओभरमा ऐटकिनसनलाई छक्का हान्दै जितको रन पूरा गरे। स्मिथ ९ बलमा २–२ चौका–छक्का मार्दै २३ रनमा अविजित रहे। वादराल्डले २३ बलमा १७ रन बनायो। इङ्ल्यान्डका लागि ऐटकिनसनले २ विकेट लिए।