मेसीको अर्को विश्व कीर्तिमान
काठमाडौं। लिओनल मेसीको नेतृत्वमा इन्टर मियामीले आइतबार बिहान क्लब इतिहासमै नयाँ अध्याय लेख्यो।
न्यूयोर्क सिटीलाई ५–१ ले हराउँदै पहिलोपटक पूर्वी सम्मेलन (इस्टर्न कन्फरेन्स) उपाधि जित्यो र पहिलोपटक एमएलएस कप फाइनलमा पनि प्रवेश गर्यो।
सामाजिक सञ्जालमा केही समर्थकले यसलाई मेसीको करिअरको ‘४७औं उपाधि’ भन्दै चर्चा गरे। तापनि त्यो दाबी सत्य भने होइन। एमएलएसको पूर्वी सम्मेलन उपाधि फिफा मान्यताप्राप्त ट्रफी होइन। त्यसैले मेसीको आधिकारिक उपाधि संख्या ४६ नै छ। फाइनल जिते मात्र उनको उपाधि संख्या ४७ मा पुग्नेछन्। भए पनि यो क्लबका लागि ऐतिहासिक उपलब्धि थियो।
मियामी चम्किएको मुख्य कारण भनेको आक्रमणमा देखिएको सहजता र समन्वय थियो। टाडेओ अलान्डेले ह्याट्रिक गरे। पहिलो दुई गोल उनले बार्सिलोनाका पूर्व जोडी जोर्डी आल्बा र सर्जियो बुस्केट्सको पासबाट गरेका थिए।
दुवै खेलाडी यसै सिजनपछि सन्न्यास लिँदै छन्। तर, मैदानमा उनीहरूको प्रभाव अझै उस्तै थियो। मेसले पनि आफ्नो जादू देखाए। सिल्भेटीलाई दिएको पास उनको करिअरको ४०५औं असिस्ट बन्न पुग्यो, जुन फुटबल इतिहासमै सर्वाधिक मानिन्छ।
मियामीका अन्य अवसरहरू पनि त्यत्तिकै धारिलो थिए। ८३औं मिनेटमा टेलास्को सेगोभियाले आल्बाको पासमा गोल गरे। ८९ औं मिनेटमा अलान्डेले ह्याट्रिक पूरा गरे। न्यूयोर्कका लागि एकमात्र गोल जस्टिन हाकले ३७औं मिनेटमा फर्काए।
अब मियामीले ६ डिसेम्बरमा एमएलएस कप फाइनल खेल्नेछ। मियामीको विपक्षी पश्चिमी सम्मेलन विजेता सान डियागो वा भ्यानकुवर हुनेछन्। यो क्लब इतिहासकै पहिलो एमएलएस कप फाइनल हो। मेसी आएपछि क्लबको यात्रा लगभग कथाजस्तै बनेको छ।
२०२३ मा लिग्स कप जितेको थियो। त्यसपछि नियमित सिजनमा उत्कृष्ट बन्दै सपोर्टर्स’ शिल्ड हात पार्यो। मेसी क्लबमा आउँदा मियामी अंक तालिकाको पुछारमा थियो। अहिले त्यही मियामी उपाधिको ढोकामा उभिएको छ। क्लबको प्रदर्शन र गौरव सबै मिलेर यो कथा आधुनिक फुटबलको एउटा सुन्दर अध्याय बनेको छ।
