बार्सिलोनाको रोमाञ्चक जित

काठमाडौं । डानी ओल्मोले दुई गोल गर्दै बार्सिलोनालाई ला लिगामा लगातार चौथो जित दिलाएका छन् ।

क्याम्प नोउमा भएको खेलमा बार्साले अलाभेसलाई ३-१ ले हराउँदै शीर्ष स्थान मजबुत बनाएको छ ।

यस जितसँगै बार्सिलोना तालिकाको शीर्षस्थानमा रह्यो र अब दोस्रो स्थानको रियल म्याड्रिडभन्दा दुई अंकले अगाडि छ ।

यद्यपि, जाबी अलोन्सोको टोली रियलसँग एउटा खेल हातमा बाँकी छ, जुन उनीहरूले आइतबार गिरोनाविरुद्ध खेल्नेछन् ।

च्याम्पियन्स लिगमा चेल्सीसँगको निराशाजनक हारपछि पुनरागमन गर्ने लक्ष्यसहित मैदान उत्रिएको बार्सिलोनाका लागि खेलको सुरुवात भने खराब रह्यो। खेलको पहिलो मिनेटमै पाब्लो इबान्येजले गोल गर्दै अलाभेसलाई अग्रता दिलाए ।

तर, बार्सिलोनाले छिट्टै खेलमा फर्किएको थियो । खेलको आठौं मिनेटमा राफिन्हाले दिएको उत्कृष्ट क्रसलाई लामिन यामालले जाली चुमाउँदै खेल बराबरीमा ल्याए । त्यसपछिको २५औं मिनेटमा ओल्मोले पहिलो गोल गर्दै बार्सिलोनालाई अग्रता दिलाए ।

क्याम्प नोउमा पुनरागमनपछि दोस्रो घरेलु खेल खेलिरहेको बार्सिलोनाले अन्तिम समयसम्म गोलको खोजी जारी राख्यो र अतिरिक्त समयमा ओल्मोले नै दोस्रो गोल गर्दै जित सुनिश्चित गरेका थिए ।