‘एन्फाले क्लबहरुलाई अलमलमा पारेको छ’

काठमाडौं । फ्रेन्ड्स क्लबका अध्यक्ष विश्वास बिक्रम शाहले एन्फाले क्लबहरुलाई अलमलमा पारेको आरोप लगाएका छन् ।

घरेलु फुटबलको संरचना कार्यान्वयनमा एन्फा स्पष्ट नहुदाँ नेपाली फुटबलले दुख भोग्नु परेको शाहको भनाई छ ।

‘राष्ट्रिय लिग भनेको छ । खेल्नुपर्ने पुसमा छ । अहिलेसम्म केही निकास आएको छैन । कहिले ए डिभिजन भनेको छ, कहिले राष्ट्रिय लिग भनेको छ । एन्फाले क्लबहरुलाई अलमलमा पारिदिएको छ ।’ शाहले भने ।

एन्फा र ए डिभिजनका क्लबहरु मिलेर पुस ९ गतेदेखि राष्ट्रिय लिग गर्ने सहमती गरेका थिए । तर फुटबल खेलाडी संघले रोकिएको डिभिजन फुटबल सुचारु हुनुपर्ने र सबै लिग तथा प्रतियोगिताको स्पष्ट खाका आउनुपर्ने माग सहित आन्दोलनमा उत्रिएपछि एन्फाले ए डिभिजन लिगको गृहकार्यलाई पुन अघि बढाएको छ ।

ए डिभिजन लिग सञ्चालनको सन्दर्भमा एन्फा, क्लब र खेलाडी संघका पदाधिकारी मंसिर ७ गतेदेखि आन्तरिक छलफलमा छन् । तर निकास निस्किएको छैन ।

राष्ट्रिय लिगको घोषणा गरेको एन्फा खेलाडीहरुको आन्दोलनपछि ए डिभिजन लिग गर्न तयार रहेको भन्दै क्लबहरुसँग छलफल अघि बढाएको छ । तर एन्फाले एकपछि अर्को निर्णय परिवर्तन गर्दा क्लबहरु अलमलमा परेको फ्रेन्ड्स क्लबका अध्यक्ष शाह बताउँछन् ।

क्लबहरु डिभिजन फुटबल खेल्न समेत तयार रहेको बताउँदै शाहले त्यसका लागि एन्फाले आवश्यक वातावरण बनाउनुपर्ने बताए । ‘क्लबहरु राष्ट्रिय लिगसँगै ए डिभिजन लिग दुवै खेल्न तयार छ । राष्ट्रिय लिग पछि रोकिएको डिभिजन फुटबल सुरु गर्न सकिन्छ तर एन्फाले क्लबहरुलाई दोष देखाउने भन्दा पनि सहजीकरण गरेर खेल्ने वातावरण बनाउन पर्यो ।’ शाहले भने ।