काठमाडौं । नेपाल पुलिस क्लबका दिनेश श्रेष्ठ वीर गणेशमान राष्ट्रिय बक्सिङ च्याम्पियनसिपको सेमिफाइनलमा प्रवेश गरेका छन् । बुधबार वसन्तपुर डबलीमा भएको ६० केजी तौल समूहको खेलमा प्रदेश ४ का जिनेश गुरुङलाई पराजित गर्दै दिनेशले अन्तिम चारमा प्रवेश गरेका हुन् ।
सोही तौल समूहमा त्रिभुवन आर्मी क्लबका एकबहादुर घले र एपीएफका प्रकाश लिम्बू समेत सेमिफाइनल प्रवेश गरे । एकबहादुरले प्रदेश ३ का सनील शाहीलाई हराए । प्रकाशले प्रदेश ७ का भरत चन्दलाई पाखा लगाए ।
प्रदेश ५ का गणेश थापामगरले प्रदेश २ का सुदीप घिसिङलाई हराउँदै सेमिफाइनलमा समीकरण पूरा गरे । पुरुष ५६ केजी तौल समूहमा एपीएफका पुरन राईले प्रदेश १ का सुरेन्द्र राईलाई पराजित गरे । प्रदेश २ का गणेश थापाले प्रदेश ५ का नवीन घर्तीलाई हराए ।
प्रदेश ७ का महेन्द्र चन्दले पुलिसका शम्भु राजवंशीलाई स्तब्ध पार्दा आर्मीका विमल रोकाले प्रदेश ६ का प्रशान्त लामाको चुनौती पन्छाए ।
आर्मीका प्रेम चौधरीले प्रदेश ५ का समिर चौधरीलाई पराजित गर्दै पुरुष ५२ केजी तौल समूहको अन्तिम ४ मा स्थान पक्का गरे । प्रदेश १ का सुलभ राज तुलाधरले प्रदेश ६ का जीवन पुन मगरलाई हराउँदा पुलिसका चन्द्रबहादुर थापाले प्रदेश ७ का सागर मल्ललाई पन्छाए । एपीएफका विक्रम परियारले प्रदेश ३ का मिङमार ग्याल्जेन शेर्पालाई हराउँदै सेमिफाइनलमा स्थान बनाए ।
पुरुष ४९ केजीतर्फ एपीएफका प्रदिप महर्जनले प्रदेश २ का पवन श्रेष्ठ तथा आर्मीका सुशील थापाले प्रदेश ३ का मदनकृष्ण डंगोललाई पराजित गर्दै अन्तिम चारमा स्थान बनाए । प्रदेश ७ का भानु विष्टले प्रदेश ५ का सुरज ओलीलाई नकआउट गरे भने प्रदेश ६ का मोहन गुरुङले पुलिसका दीपेश राईलाई स्तब्ध पारे ।
महिलातर्फ ४६–४८ केजी तौल समूहमा पुलिसकी दिवाना शेर्माले एपीएफकी नाङ्गजा बुढामगरलाई हराउँदै सेमिफाइनलमा स्थान बनाइन् । आर्मीको ललिता महर्जनले प्रदेश १ की मन्जिता माखिम, प्रदेश ३ की सुष्मा तामाङले प्रदेश ६ की जानकी थापा तथा प्रदेश ५ की सुशिला थापाले प्रदेश ८ की प्रतिभा शाहीलाई पराजित गरे ।
आर्मीकी विमला श्रेष्ठले ४८–५१ केजी तौल समूहमा प्रदेश २ की मनिषा राईलाई हराउँदै अन्तिम ४ मा स्थान बनाइन् । प्रदेश ४ की मिना घले, प्रदेश ३ की रोशनी राई र एपीएफकी माला राई पनि अन्तिम ४ मा प्रवेश गरे । मिनाले प्रदेश ६ कि सुष्मा पुन मगर, रोशनीले प्रदेश ५ की विमला थापा मगर तथा मालाले प्रदेश १ की अरुणा योन्जनलाई पराजित गरे ।
एपीएफकी संजुमाया थिङले महिला ५१–५४ केजी तौल समुहमा प्रदेश ७ की हरिना ऐरलाई पराजित गर्दा प्रदेश २ की तेजी गुरुङ र पुलिसकी निशा तामाङ पनि सेमिफाइनल पुगे । तेजीले प्रदेश ३ की शिवानी श्रेष्ठ तथा निशाले प्रदेश १ कि चन्द्रकला राईलाई पराजित गरिन् ।
महिला ६०–६४ केजी तौल समूहमा आर्मीकी पुनम रावलले प्रदेश १ की त्रिशा जबेगुलाई हराउँदै अन्तिम ४ को यात्रा सुनिश्चित गरिन् । एपीएफकी सरस्वती रानाले प्रदेश ३ कि अम्बिका विकलाई पराजित गर्दा प्रदेश ६ की अश्मिता चन्दले प्रदेश ५ की माया चौधरीलाई पाखा लगाइन् ।
वीर गणेशमान सिंह फाउन्डेसनको आयोजनामा माघ २६ गतेसम्म चल्ने प्रतियोगितामा प्रत्यक तौल समूहको विजेताले २५ हजार प्राप्त गर्नेछन् । प्रतियोगिताभरको उत्कृष्ट महिला र पुरुष खेलाडीले क्रमशस् स्कुटर र मोटरसाइकल प्राप्त गर्नेछन् ।
