केभिआर समिट च्यालेन्ज शनिबारदेखि

काठमाडौं। ट्रेलमान्डु नेपालको आयोजनामा ‘केभिआर समिट च्यालेन्ज’ शनिबारदेखि सुरु हुने भएको छ। यो प्रतियोगिता हरेक महिना आयोजना हुने नियमित ट्रेल रनिङ सिरिज हो।

काठमाडौं उपत्यकालाई घेर्ने पाँच प्रमुख हिमाल फुलचोकी, शिवपुरी, भस्मासुर, चन्द्रागिरी र जामाचोमध्ये एउटाको शिखरमा पुग्ने २० देखि ३० किलोमिटर दूरीको कठिन ट्रेल रुटमा यो प्रतियोगिता हुने आयोजकले जनाएका छन्।

ट्रेलमान्डुले यसअघि दुई सत्र सफलतापूर्वक सम्पन्न गरिसकेको छ। यस वर्षको प्रतिस्पर्धामा परिवारमैत्री वातावरण सृजना गर्ने उद्देश्य राखिएको छ। सहभागीहरूले फरक–फरक दूरीमा प्रकृतिको आनन्द लिँदै दौडन वा पैदल यात्रा गर्न सक्नेछन्।

नयाँ धावक र दृश्यावलोकन गर्न चाहनेका लागि ७ देखि १० किलोमिटर दूरीको ‘फन रन/हाइक’ समेत समावेश गरिएको छ। आयोजकका अनुसार यो छोटो ट्रयाक परिवार र साथीहरूका लागि उपयुक्त बनाइएको छ।

यस वर्षको पहिलो रेसमा हालसम्म अमेरिका, जापान, फ्रान्स, नर्वे, भारतलगायत १३ देशका ८० भन्दा बढी धावकले दर्ता गरिसकेका छन्।