भारत र पाकिस्तानले एसिया कपको पारिश्रमिक सेना र पीडित दिने भए

काठमाडौं। पाहलगाममा भएको आतंककारी आक्रमणलाई लिएर भारत र पाकिस्तानबीच युद्धको स्थिति सिर्जना भएको थियो।

भारतले ‘अपरेशन सिन्दूर’ नाम दिएर मिसाइल आक्रमण गरेको दाबी छ भने पाकिस्तानले त्यसको प्रतिउत्तर ‘बुनियानुम मार्सुस’ नामक कारबाहीमार्फत दिएको थियो।

मे महिनाको पहिलो साता सुरु भएको युद्धमा भारतले पाकिस्तानका विभिन्न सैन्य आधारहरूलाई आक्रमण गर्‍यो। पाकिस्तानले पनि तत्कालै जवाफी कारबाही गर्‍यो। युद्धकै बीचमा भारतको इन्डियन प्रिमियर लिग (आइपीएल) र पाकिस्तानको पाकिस्तान प्रिमिर लिग (पीएसएल) रोकिएका थिए।

मे १० मा अमेरिकाको मध्यस्थतामा युद्धविराम भएको थियो। यसअघि भारततर्फ करिब ३० जना सैनिक तथा सर्वसाधारण मारिएका थिए। पाकिस्तानतर्फ मृतकको संख्या ५० भन्दा बढी पुगेको थियो। घाइतेको संख्या दुवै देशमा उल्लेख्य थियो।

त्यसै समयदेखि भारतले पाकिस्तानसँग खेल नखेल्ने अडान लिएको हल्ला चले पनि यो एसिया कपमा दुवै टिम तीन पटक आमनेसामने भए। अन्तिम खेलमा भारतले पाकिस्तानलाई ५ विकेटले हराउँदै उपाधि जित्यो। उपाधि जितेपछि भारतीय कप्तान सूर्यकुमार यादवले प्रतियोगिताभरि खेलेका खेलको पारिश्रमिक भारतको सशस्त्र सेनालाई दान गर्ने घोषणा गरे।

प्रेस कन्फरेन्समा उनले भने,‘मैले यस प्रतियोगितामा खेलेका सबै खेलहरूको पारिश्रमिक भारतीय आर्मीलाई दिने निर्णय गरेको छु।’

यता, पाकिस्तानका कप्तान सलमान अली आगाले पनि भावनात्मक घोषणा गरे। उनले भने,‘हामी टिमका रूपमा एसिया कप फाइनलको पारिश्रमिक भारतको आक्रमणमा पीडित भएका नागरिकहरूलाई दान गर्दैछौं।’