एसिया प्यासिफिक मोटर स्पोर्ट्स : नेपालका ६ खेलाडीबारे जान्नुहोस्

काठमाडौं । एसिया प्यासिफिक मोटर स्पोर्ट्स च्याम्पियनसिपमा नेपालले प्रतिस्पर्धा गर्दैछ । नेपालका मोटरस्पोर्ट्सका ६ खेलाडीले श्रीलंकामा जारी एसिया प्यासिफिक क्षेत्रको सबैभन्दा ठुलो प्रतियोगितामा प्रतिस्पर्धा गर्न लागेका छन् ।

नेपाल अटोमोबाइल्स एसोसिएसन (नासा नेपाल) को व्यवस्थापनमा ६ जना नेपाली खेलाडी र १ जना अफिसियल कोलम्बो पुगिसकेका छन् । श्रीलंकाको कोलम्बो पुगेका २५ देशका २ सय १० ड्राइभरहरुले शनिबारदेखि प्रारम्भिक चरणको रेसिङ्गमा सहभागी हुनेछन् । आईतबार फाइनल चरणका रेस सहित च्याम्पियनसिपको समापन हुनेछ ।

अन्तर्राष्ट्रिय अटोमोबाइल्स फेडेरेसन (एफआईए)को वार्षिक क्यालेण्डरमा इन्टरकन्टिनेन्टल गेम्सको मान्यताप्राप्त प्रतियोगितामा अटो–जिमखाना, क्रस–कार, अटोक्रस तथा ई–स्पोर्ट्स विधामा नेपालबाट आशिष भारती, राजकुमार कार्की, बिपास्ना तामाङ, जय प्रताप मास्के, रबिन सुनुवार र रोशन अधिकारी गरी ६ खेलाडी सहभागी छन् भने टिम म्यानेजरको रुपमा आशीष रौनियार छन् ।

आशिष (रोनी) भारती

ललितपुरका ३१ वर्षिय आशिष (रोनी) भारती फोर ह्विलर्स रेसिङमा नेपालका उत्कृष्ट खेलाडी हुन् । यस अघि मलेसियामा भएको एसिया प्यासिफिक मोटरस्पोट्र्स च्याम्पियनसिपमा पनि आशिष सहभागी थिए । भारत र थाइल्यान्डमा २०१८, इन्डोेसियामा २०१९ र मलेसियामा २०२३ मा भएका अन्तर्राष्ट्रिय स्तरको अटो जिमखाना प्रतियोगितामा उनले भाग लिएका छन् । राष्ट्रिय प्रतियोगिताहरूमा भने अटो जिमखाना चितवन २०२३, टाइम अट्याक च्यालेन्ज २०२२, नेसनल अटोक्रस २०२४ र माउन्ट एभरेष्ट मोटरस्पोट्र्स फेस्टिभल २०२५ मा उपाधि जितेका छन् । उनको रमाइलो भनाइ छ, ‘म कार नै खान, पिउन र सुत्न सक्छु यो मेरा लागि जीवनशैली हो ।’

राजकुमार कार्की

नुवाकोटका २८ वर्षिय राजकुमार कार्की नेपालका चर्चित बाइक रेसर हुन् । उनी एक दशक भन्दा बढी समयदेखि यस खेलमा आबद्ध छन् । टु ह्विलर्स रेसिङका चर्चित खेलाडी उनी १० पटकभन्दा बढीका पोडियम होल्डर हुन्, जुन नेपालको लागि कीर्तिमान समेत हो । उनी विभिन्न अन्तर्राष्ट्रिय इभेन्टमा समेत सहभागी भइसकेका छन् । फोर ह्विलरमा भने उनको पहिलो अन्तर्राष्ट्रिय सहभागिता हो ।

बिपास्ना तामाङ

चाँगुनारायण भक्तपुरकी २७ वर्षिया बिपास्ना तामाङ इभेन्ट होस्ट हुँदै मोटरस्पोट्र्समा लागेकी हुन् । केही समयअघि भएको बागमती अटो जिमखाना च्याम्पियनसिप नै उनको पहिलो राष्ट्रिय स्तरको इभेन्ट हो, जहाँ उनी दोसो भएकी थिइन् । उनको पहिलो सहभागिताले आगामी दिनमा अझै अब्बल प्रदर्शनको ढोका खोल्ने अपेक्षा गरिएको छ ।

जय प्रताप मास्के

काठमाडौं बौद्धका २९ वर्षिय जय प्रताप मास्के खासमा सिम रेसिङका खेलाडी हुन् । उनले सन् २०२३ मा सिङ्गापुरमा आयोजित ओलम्पिक ई–स्पोर्ट्स सिरिजमा नेपालका एक मात्र खेलाडीको रुपमा प्रतिनिधित्व गरिसकेका छन् । कोलम्बोमा भइरहेको अटोक्रस फम्र्याटको क्रसकार रेसमा उनले भाग लिदैछन् । क्रस कार इभेन्ट विश्वमै नौलो प्रतिस्पर्धा भएकोले यसमा नेपाली खेलाडीको पनि राम्रो सम्भावना रहेको विश्वास रहेको उनको भनाइ छ । उनी आफै नेपालमा सिम रेसिङको व्यवसाय पनि गर्छन् र भविष्यमा अन्तर्राष्ट्रिय स्तरको ट्रेनिङ लिने, प्रो–ड्राइभर बन्ने र ट्रेनर बन्ने लक्ष्य रहेको बताउँछन् ।

रबिन (रेहान) सुनवार

बुढानीलकण्ठका २७ वर्षिय रबिन (रेहान) सुनवारले सन् २०२२ मा मुलपानीमा भएको टाइम अट्याक च्यालेन्जबाट मोटरस्पोट्र्समा यात्रा सुरु गरेका थिए । उनले सन् २०२४ मा चन्द्रागिरीमा भएको अटोक्रसमा चौथो स्थान हात पारेका थिए । त्यस्तै अन्य इभेन्टमा समेत उनले उपाधि हासिल गरेका छन् । सानै उमेरदेखि रेसमा रुचि राख्ने रबिनले पहिलो पटक अन्तर्राष्ट्रिय इभेन्टमा सहभागिता जनाउन लागेका हुन् । यसका लागि उनी निकै उत्साहित छन् ।

रोशन अधिकारी

कास्कीका २५ वर्षीय रोशन अधिकारीले आफ्नो मोटरस्पोट्र्स यात्रा सन् २०१८ मा भारतको कोयम्बटुरमा फर्मुला फोर्डमार्फत सुरु गरेका हुन् । ट्रर्याकमा रेसिङसँगै उनले ई–स्पोर्ट्स तर्फ रुचि बढाउँदै सन् २०२२ देखि अष्ट्रेलियाका स्थानीय इभेन्टहरुमा प्रतिस्पर्धा गर्दै आएका छन् । हाल सिड्नी मोटरस्पोर्ट क्लबका अधिकृत समेत भएकाले उनलाई अन्तर्राष्ट्रिय मोटरस्पोर्ट्स समुदायसँग नजिक हुन मद्दत गरेको छ ।

पहिलो पटक एसिया–प्यासिफिक मोटरस्पोट्र्स च्याम्पियनसिप जस्तो अफिसियल इभेन्टमा सहभागी हुन लागेका उनले श्रीलङ्कामा हुने प्रतियोगितालाई आफ्नो करियरमा ठूलो अवसरका रूपमा लिएका छन् । हाल अष्ट्रेलियामा बसोबास गर्ने रोशन विभिन्न ई–स्पोर्टस् प्रतियोगितामा भाग लिएर राम्रो प्रदर्शनी गर्दै आएका छन् र श्रीलङ्का आउने अन्तर्राष्ट्रिय खेलाडीहरुलाई टक्कर दिने अनुमान गरिएको छ ।

एसिया प्यासिफिक मोटर स्पोर्ट्स च्याम्पियनसिप ओलम्पिक शैलीमा आयोजना हुने एसिया प्यासिफिक क्षेत्रको सबैभन्दा ठूलो मोटर स्पोट्र्सको प्रतियोगिता हो । सन् २०२३ मा मलेसियाको सेपाङ अन्तर्राष्ट्रिय सर्किटबाट सुरु भएको यस च्याम्पियनसिपको दोस्रो संस्करण आज सुरु भई २८ सेप्टेम्बरमा श्रीलङ्काको कोलम्बो स्थित श्रीलङ्का कार्टिङ सर्किटमा सम्पन्न हुनेछ ।

मोटरसाइक्लिङ रेसिङ अत्यन्तै लोकप्रिय रहेको देश नेपालमा मोटर स्पोर्ट्सका भने अटो जिमखाना, अटोक्रस र कार्टिङका इभेन्टहरु प्रचलित छन् भने टीएसडी र्याली र टुरिङ खेल पर्यटनको समेत पर्याय बन्दै गएका छन् ।