फिका हुँदै भारत र पाकिस्तानको ‘राइभलरी’

काठमाडौं। भारत र पाकिस्तानबीचको क्रिकेट खेललाई विगतमा सधैं रोमाञ्चक प्रतिद्वन्द्विताका रूपमा हेरिन्थ्यो। तर, हालका नतिजाले यो धारणा फिका पारिदिएका छन्।

एसिया कप सुपर फोमा आइतबार भारतले पाकिस्तानलाई फेरि हराउँदै एकतर्फी जित निकालेपछि भारतीय कप्तान सूर्यकुमार यादवले नै यो अब ‘राइभलरी’ नभएको बताएका छन्।

समूह चरणमै पाकिस्तानलाई सहजै हराएको भारतले सुपर फोमा समेत ६ विकेटले जित निकाल्यो। पाकिस्तानका कप्तान सलमान आघाको टोलीले राम्रो सुरुआत पाए पनि कमजोर बलिङ गर्दा खेल गुमायो।

खेलपछि पत्रकार सम्मेलनमा सूर्यकुमारले भने,‘अब तपाईंहरूले यो राइभलरीबारे प्रश्न गर्नै बन्द गर्नुपर्छ। राइभलरी त्यतिबेला भनिन्छ जब दुई टिमबीच बराबरीजस्तो रेकर्ड हुन्छ। १५–२० खेलमा यदि ७–७ वा ८–७ हुन्छ भने त्यो राइभलरी हो। तर, १३–०, १०–१ जस्ता नतिजा हुँदाखेरी यसलाई राइभलरी भन्न मिल्दैन।’

भारतविरुद्ध पछिल्ला ८ मध्ये ७ खेलमा पाकिस्तान हारिसकेको छ। २०२१ मा दुबईमा जितेपछि पाकिस्तानले फेरि कहिल्यै भारतलाई हराउन सकेको छैन।

यस पटकको खेलमा टर्निङ पोइन्टबारे सूर्यकुमारले भने,‘मलाई लाग्छ पहिलो इनिङ्सको मध्यावधि नै निर्णायक भयो। त्यति बेला नै हाम्रो शरीरको जोश फेरियो। सामान्यतया खेल पावर प्लेपछि बदलिन्छ, तर आज भने १० ओभरपछि हाम्रो बलरहरूले परिस्थितिलाई राम्ररी बुझेर नियन्त्रण लिए।’

यस जितसँगै भारतले पाकिस्तानविरुद्धको अपराजित यात्रा ७–० मा पुर्‍याएको छ। पछिल्ला सातै खेलमा भारतसँग पाकिस्तान पराजित भएको छ। चाहे टी–२० होस् वा वानडे, विश्वकप होस् वा एसिया कप, पाकिस्तान टिक्न सकेको छैन।

२०२२ को टी–२० विश्वकपमा सुरुआत भएको यो सिलसिला अझै रोकिएको छैन। एसिया कप २०२३ मा भारतले २२८ रनले जित निकालेको थियो भने वानडे विश्वकप २०२३ मा पनि पाकिस्तानलाई ७ विकेटले हराएको थियो। च्याम्पियन्स ट्रफी र अन्य प्रतियोगिताहरूमा समेत नतिजा भारतकै पक्षमा रहेको छ।

सुपर फोको खेलमा पाकिस्तानले टस हारेर पहिले ब्याटिङ गर्दै साहिबजादा फरहानको अर्धशतकको बलमा २० ओभरमा ५ विकेट गुमाउँदै १७१ रन बनायो। तर, भारतको सुरुआत धमाकेदार रह्यो। अभिषेक शर्मा र शुभमन गिलले पहिलो विकेटका लागि १०५ रनको साझेदारी गर्दै पाकिस्तानलाई खेलमै फर्कन दिएनन्।

भारतले १८.५ ओभरमै ४ विकेटको क्षतिमा १७४ रन बनाएर जित निकाल्यो। अभिषेकले ३९ बलमा ६ चौका र ५ छक्कासहित ७४ रन प्रहार गरे। गिल पनि २८ बलमा ८ चौकासहित ४७ रन बनाएर अर्धशतकनजिकै पुगेर आउट भए।