काठमाडौं। लिओनल मेसीले आफ्नो चम्किलो करिअरमा अन्तिमपटक अर्जेन्टिनाको राष्ट्रिय टोलीका साथ घरेलु विश्वकप छनोट खेल्दा राम्रो सम्झना बनाइरहेका छन्।
बिहीबार मेसीले दुई गोल गर्दै अर्जेन्टिनाको भेनेजुएलामाथि ३–० को जित सुनिश्चित गरे। स्टेडियो मोनुमेन्टलमा जम्मा भएको भीड उनलाई विदाई दिन उपस्थित थियो।
‘यसरी यहाँ अन्तिममा खेल्न पाउनु मेरो सधैंको सपना थियो,’ मेसीले भने, ‘मैदानमा धेरै अनुभवहरू प्राप्त गरेको छु, राम्रो पनि नराम्रो पनि। तर, सधैं अर्जेन्टिनामा हाम्रा समर्थकहरूको सामु खेल्नु ठूलो खुसी हो।’
मेसीले अहिलेसम्म खेलबाट कहिले बिदा हुने भन्ने कुनै संकेत दिएका छैनन्। तर, २०३० विश्वकपका छनोट खेल २०२७ मा सुरु हुने छन्। त्यतिबेला उनी ४० वर्षका हुनेछन्।
अर्जेन्टिनाका कप्तान मेसीले ३९औं र ८०औं मिनेटमा गोल गरे भने ७६औं मिनेटमा लौटारो मार्टिनेजले गोल थपे। दक्षिण अमेरिकी विश्वकप छनोटमा उनी सबैभन्दा धेरै गोल गर्ने खेलाडी बनेका छन्। उनले कुल ३६ गोल गरेका छन्।
उनका इन्टर मियामी टोलीका सहकर्मी लुइस सुआरेजले २९ गोल छन्, तर उनले उरुग्वेको राष्ट्रिय टोलीबाट बिदा लिइसकेका छन्। बोलिभियाका मार्सेलो मोरेनो मार्टिन्स तेस्रो स्थानमा छन्। उनले २२ गोल गरेका छन्।
आगामी विश्वकपका लागि मेसीले भने, ‘म उत्साहित छु। दिनहुँ अनुभव गरिरहेको छु। यदि शरीरले साथ दिन्छ भने म खेल्छु नभएँ, त्यहाँ हुनु आवश्यक छैन। प्रतियोगिता सुरु हुन अझ नौ महिना बाँकी छ, जुन लामो समय हो।’
पहिले नै छनोट भइसकेका अर्जेन्टिना तालिकामा ३८ अंकसहित शीर्ष स्थानमा छ। मंगलबारको अन्तिम खेलले जे भए पनि दक्षिण अमेरिकी छनोट तालिकाको शीर्ष स्थानमा रहनेछ।
भेनेजुएलाले पहिलोपटक विश्वकपमा प्रवेश गर्ने लक्ष्य राखेको छ। तर, भेनेजुएला १८ अंकसहित सातौं स्थानमा छ। अझै अन्तरमहाद्वीपीय प्लेअफको लागि प्रतिस्पर्धामा छ।
-1757040960.webp)
