काठमाडौं। सन्दीप जोराको सानादर ब्याटिङसँगै नेपाल ‘ए’ ले आसाम प्रदेश क्रिकेट संघसँगको अभ्यास खेलमा लगातार दोस्रो जित हात पारेको छ।
शनिबार सम्पन्न खेलमा नेपालले ९ रनको जित हात पारेको हो। योसँगै नेपालले ५ खेलको सिरिजमा २-१ को अग्रता लिएको छ। पहिलो खेलमा नेपाल नेपाल डक वर्थ लेविस (डीएसएल) पद्धिका आधारमा १५ रनले पराजित भएको थियो।
नेपालले दिएको १९७ रनको लक्ष्य पछ्याएको आसामले निर्धारित २० ओभरमा सबै विकेट गुमाउँदै १८७ रन मात्रै बटुल्न सक्यो।
आसामका निहार डेकाले सर्वाधिक ४० रन बनाए। २३ बल खेलेका उनले ६ चौका र १ छक्का प्रहार गरे। कप्तान सुमित घाडीगाउँकर ३६ रनमा आउट हुँदा अब्दुल अजिज ३१ रनमा अविजित रहे।
नेपालका कमलसिंह ऐरी, आकाश चन्द, विवेककुमार यादव र बसीर अहमदले समान २ विकेट लिए। आदिल आलमको नाममा १ विकेट रह्यो।
त्यसअघि एसीए क्रिकेट एकेडेमीको मैदानमा टस हारेर पहिला ब्याटिङ थालेको नेपालले निर्धारित २० ओभरमा ६ विकेट गुमाउँदै १९६ रन बनाएको थियो।
नेपालका सन्दीपले सर्वाधिक ७४ रन बनाए। ४८ बल खेलेका उनले ६ चौका र ४ छक्का प्रहार गरे। आदिल ३५, त्रित्रराज दास ३३ र कप्तान अनिलकुमार साह ३१ रनमा आउट भए।
आसामका आकाश सेनगुप्ताले सर्वाधिक २ विकेट लिए।
