काठमाडौं। कराते खेलाडी तथा प्रशिक्षक रहिसकेका नारायण देव राणाले नेपाल लोकतान्त्रिक खेलकुद संघको हुन लागेको निर्वाचनमा अध्यक्ष पदमा उम्मेदवारी दिने घोषणा गरेका छन्।
११ वर्ष अगाडि गठित नेपाली काँग्रेसको खेलकुदको भातृ संगठनको रुपमा रहेको लोकतान्त्रिक खेलकुद संघको यहि भदौ २२ गते निर्वाचन हुंदैछ। निर्वाचनमा देशभरीबाट ९ सय वढी खेलकुदमा आवद्ध ब्यक्तिहरुले मतदान गर्नेछन्।
राणा नेपाली कांग्रेस ललितपुर क्षेत्र नम्बर ३ का महाधिवेशन प्रतिनिधि हुन्।
बुधबार काठमाडौंमा आयोजित पत्रकार सम्मेलनमार्फत आफ्नो उम्मेदवारी घोषणा गरेका हुन्।
घोषणा समारोहमा उनको समर्थन गर्न थुप्रै ब्यक्तिहरुको उपस्थिति थियो। जसमा बाग्मती प्रदेशका पुर्व खेलकुद मन्त्री मीनकृष्ण महर्जन, ललितपुर जिल्ला खेलकुद विकास समितिका अध्यक्ष विनोद महर्जन, नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ, करातेका प्रमुख प्रशिक्षक दीपक श्रेष्ठ माने, करातेका स्वर्णधारी खेलाडी गंगाराम महर्जन, आठौं साफका स्वर्णधारी रबि महर्जन लगायत थिए।
उक्त बेला राणाले घोषणा गर्दै भने, 'खेलकुद विकासको ठूलो जिम्मेवार निकाय रहेर पनि विगतमा हाम्रो संगठनले खेलकुद क्षेत्रमा खासै प्रभावकारी काम गर्न सकेको देखिएन। मेरो उम्मेदवारी निस्कृय संघलाई चलायनमान बनाउने र उदेश्य छुने हो।'
सोही अवसरमा पुर्व मन्त्री महर्जनले खेलकुद क्षेत्रमा गर्ने प्रशस्त कामहरु भएता पनि विगतको नेतृत्व असक्षम बनेकोले लोकतान्त्रिक खेलकुद संघ जोगाउन राणाको समर्थनमा आएको बताए।
उनले भने, 'पुरानो नेतृत्वले काम नै गरेन। काम गर्ने सक्षम ब्यक्ति त चाहियो नी। राणामा त्यो क्षमता छ।'
खेलाडी र प्रशिक्षकका रुपमा नेपाली खेलकुदमा राणाको बेग्लै परिचय छ।
राष्ट्रिय खेलकुद परिषद कर्मचारी संघमा सन् २००७ र सन् २०१० मा गरी दुई पटक अध्यक्षको जिम्मेवारी गर्दा उनले आफ्नो नेतृत्व क्षमता पुस्टी गरेका थिए।
यसअघि कराते खेलाडीका रूपमा सन् १९८५ देखि १९९९ सम्म सक्रिय रहँदै विभिन्न अन्तर्राष्ट्रिय प्रतियोगितामा नेपाललाई पदक दिलाएका राणाले १९९२ मा काठमाडौंमा भएको दोस्रो दक्षिण एसियाली कराते च्याम्पियनसिपमा स्वर्ण तथा १९९१ मा एशियन एसकेएफ शिखर कराते डो च्याम्पियनसिपमा कांस्य पदक जितेका थिए।
सक्रिय खेल जीवनपछि उनले प्रशिक्षकको रूपमा २००६ दोहा एसियाड, २०१२ हडकड र २०१८ इन्डोनेशिया एशिया प्यासिफिक कराते प्रतियोगितामा नेपाली टोलीलाई नेतृत्व गरेका थिए।
साथै, करातेको अन्तर्राष्ट्रिय रेफ्रीको रूपमा पनि उनले लामो समय योगदान गरेका छन्। नेपाली खेलकुद नेतृत्वमा अनुभवी उनले २०१५ देखि नेपाल कुस्ती संघको अध्यक्षको जिम्मेवारी सम्हालेका थिए।
