क्रोएसियामाथि ब्राजिलको जित

काठमाडौं। ब्राजिलले मंगलबार अमेरिकाको ओर्लान्डोमा भएको विश्वकप तयारी मैत्रीपूर्ण खेलमा क्रोएसियालाई ३–१ ले पराजित गरेको छ।

खेलको सुरुवातदेखि नै ब्राजिलले बल नियन्त्रणमा राख्दै दबाब सिर्जना गरेको थियो। पहिलो हाफ सकिनु अघि माटेउस कुन्हाले भिनिसियस जुनियरलाई पास दिए। उनले तीन डिफेन्डरलाई छल्दै अगाडि बढे र डानिलोका लागि सुन्दर पास मिलाए। डानिलोले पहिलो टचमै उत्कृष्ट गोल गर्दै ब्राजिललाई अग्रता दिलाए।

दोस्रो हाफमा भने क्रोएसियाले खेलमा पकड बनायो र ८४औं मिनेटमा बराबरी गोल फर्कायो। लोभ्रो माजेरले डिफेन्सबीचबाट स्थान बनाउँदै टोनी फ्रुकको क्रसलाई सदुपयोग गर्दै गोल गरे।

बराबरीपछि ब्राजिल फेरि आक्रामक बन्यो र चार मिनेटपछि पुनः अग्रता लियो। एन्ड्रिकलाई पेनाल्टी क्षेत्रभित्र लडाइएपछि इगोर थियागोले पेनाल्टीमार्फत गोल गर्दै टोलीलाई अगाडि बढाए।

इन्जुरी समयमा गाब्रिएल मार्टिनेलीले लो शटमार्फत अर्को गोल थप्दै ब्राजिलको जित सुनिश्चित गरे।