काठमाडौं। नेपाल र भुटानबीच साफ यु–१७ महिला च्याम्पियनसिपमा रोचक भिडन्त हुँदैछ।
थिम्पुस्थित चाङ्लिमिथाङ रंगशालामा भारतसँगको पहिलो खेलमा ठूलो अन्तरले पराजित भएको नेपाललाई यो खेल जित्दै अभियानमा फर्किने अवसर हुनेछ। तर, भुटानलाई हराउन त्यति सजिलो पनि छैन।
बंगलादेशविरुद्ध पहिलो खेलमा ३–१ ले पराजित भए पनि भुटानी टोलीले देखाएको आत्मविश्वासी खेलले उनीहरूलाई नेपालविरुद्ध थप उर्जा दिनेछ। घरेलु समर्थकको साथ र आफ्ना केही आक्रामक खेलाडी लयमा रहेका कारण भुटानलाई हल्का आँकलन गर्नु नेपालका लागि जोखिमपूर्ण हुन सक्छ।
नेपालले पछिल्ला भेटमा भुटानविरुद्ध राम्रो नतिजा निकाल्न नसकेको तथ्य पनि छ। गत वर्ष त्रिपुरेश्वरस्थित दशरथ रंगशालमा भएको यु–१६ मैत्रीपूर्ण खेलमा भुटानले नेपाललाई ५–१ को लज्जास्पद हार चखाएको थियो। त्यसैले यसपटक मैदानमा उत्रँदा नेपाली खेलाडीहरूमाथि पुरानो घाउ मेटाउने दबाब रहनेछ।
यद्यपि नेपालसँग पनि आफ्नो बलियो आत्मविश्वासमा कायम छ। कप्तान भूमिका बुढाथोकीजस्ता अनुभवी खेलाडी टोलीमा छन्। भारतविरुद्धको हारपछि सुधार गर्ने वाचासहित मैदान उत्रिने उनीहरूको लक्ष्य छ।
अब नेपाललाई जित मात्रै होइन, आत्मविश्वास पुनःस्थापित गर्ने चुनौती पनि थपिएको छ। अट्याकिङ मिडफिल्डर बबिता कार्की भन्छिन्, ‘भुटानलाई कमजोर मान्न सकिँदैन। तर, हामीसँग अनुभव र तयारी दुवै छ। यसपटक हामी सजग रहँदै चुनौती दिनेछौं।’
साफको तल्लो उमेर समूहको इतिहासले पनि नेपाल–भुटान प्रतिस्पर्धा सधैं रोमाञ्चक हुने देखिन्छ। पछिल्ला पाँच भेटमा नेपालले दुई र भुटानले एक खेल जितेको छ। यसपटकको खेलमा पनि नेपाली टोलीको आत्मविश्वास पुनःजाग्ने वा भुटानले फेरि चमत्कारी जित हात पार्ने दुवै सम्भावना खुला छ।
