नर्वेले इजरायलविरुद्धको खेलमा बिक्री हुने टिकटको आम्दानी गाजालाई दिने

काठमाडौं। नर्वेजियन फुटबल संघ (एनएफएफ) ले आउँदो विश्वकप छनोटअन्तर्गत इजरायलविरुद्धको खेलमा बिक्री हुने टिकटको आम्दानी गाजामा मानवतावादी राहतका लागि दिइने घोषणा गरेको छ। 

नर्वेले ११ अक्टोबरमा ओस्लोको उललेभाल स्टेडियममा इजरायललाई घरेलु मैदानमा स्वागत गर्नेछ। टिकट बिक्री २५ अगस्टदेखि खुल्नेछ।

एनएफएफकी अध्यक्ष लिस क्लावेनेसले मंगलबार जारी गरेको विज्ञप्तिमा भनिन्,‘लामो समयदेखि गाजामा नागरिक जनसंख्यालाई भोग्नुपरेको मानवतावादी संकट र असमान आक्रमणप्रति उदासीन रहन सक्दैनौं। हामी यस आम्दानीलाई गाजामा दैनिक जीवन  चलाउने र सक्रिय आपतकालीन सहयोग प्रदान गर्ने मानवतावादी संस्थालाई दिन चाहन्छौं।’

यसमा इजरायल फुटबल संघ (आइएफए) ले बुधबार प्रतिक्रिया दिँदै नर्वेजियन संघलाई ७ अक्टोबर २०२३ को हमास आक्रमणको पनि निन्दा गर्न आग्रह गरेको छ। साथै, पैसा आतंकवादी संगठन वा व्हेल हन्टिङ्गमा प्रयोग नहोस् भनेर सुनिश्चित गर्न भनेको छ।

आइएफएले युइएफए र स्थानीय प्रहरीले सुरक्षा व्यवस्थामा समन्वय गरिरहेको जनाएको छ। सुरक्षा कारणले २६ हजार सिटको स्टेडियममा अधिकतम ३ हजार सिट घटाउने सम्भावना छ।

इजरायल गत वर्ष अक्टोबरदेखि आफ्नै घरमा खेल आयोजना गर्न असमर्थ भएकोले मार्चमा नर्वेविरुद्धको खेल हंगेरीमा खेलेको थियो, जहाँ नर्वेले ४–२ को जित हात पारेको थियो। हाल नर्वे पाँच राष्ट्रको समूहमा इजरायल र इटालीभन्दा अघि शीर्ष स्थानमा छ।