काठमाडौं। फ्लुमिनेन्सका गोलकिपर फाबियोले पुरुष फुटबलमा सबैभन्दा धेरै प्रतिस्पर्धात्मक खेल खेलेर विश्व कीर्तिमान कायम गरेका छन्। ४४ वर्षीय ब्राजिलियन गोलकिपरले एक हजार ३९१औं खेल खेल्दै इङ्ल्यान्डका पूर्वगोलकिपर पिटर शिल्टनको कीर्तिमान भंग गरेका हुन्।
गत शनिबार शिल्टनको बराबरी गरेका फाबियोले माराकाना रंगशालामा अमेरिक डी कालीविरुद्धको २–० को जितसँगै उक्त कीर्तिमान तोडेका हुन्। फ्लुमिनेन्स र ब्राजिलियन सञ्चारमाध्यमका अनुसार अब फाबियो इतिहासमै अग्रस्थानमा पुगेका छन्। यद्यपि, फिफा वा दक्षिण अमेरिकी फुटबल महासंघले यसलाई आधिकारिक कीर्तिमानको मान्यता भने दिएका छैनन्।
‘कहिलेकाहीँ हामीलाई यस्ता महत्त्वपूर्ण उपलब्धि हासिल गर्दा त्यसको वास्तविक महत्व तत्काल थाहा हुँदैन। यो कीर्तिमान धेरै वर्षसम्म कायम थियो र यसलाई तोड्न पाउनु निकै ठूलो कुरा हो,’ फाबियोले कोपा सुदामेरिकाना अन्तर्गत अन्तिम १६ को दोस्रो चरणमा ‘क्लिनसिट’ राखेपछि भने।
माराकानामा उपस्थित घरेलु समर्थकहरूले फाबियो ब्राजिलको उत्कृष्ट गोलकिपर भन्दै नाराबाजी गरेका थिए। फ्लुमिनेन्सका प्रशिक्षक रेनाटो गाउचोले भने,‘यति धेरै खेल खेल्न असाधारण व्यवसायिकपन चाहिन्छ। उनले अझै लामो समय खेल्नेछन् भन्नेमा कुनै शंका छैन। उनको यो कीर्तिमान अरूले तोड्न निकै कठिन हुनेछ।’
फाबियोले २०२३ मा फ्लुमिनेन्ससँगै कोपा लिबर्टाडोरेस जितेका थिए र यसै वर्ष अमेरिकामा भएको क्लब विश्वकपको सेमिफाइनलसम्म पुगेका टोलीका सदस्यसमेत थिए। उनले करिअरको सबभन्दा लामो समय क्रुजेरोसँग बिताउँदै २००५ देखि २०२२ सम्म ९७६ खेल खेले।
यसअघि उनले उनियाओ बन्देइरान्तेसँग ३० र भास्को दा गामासँग १५० खेल खेलेका थिए। अमेरिक डी कालिविरुद्धको खेल उनको फ्लुमिनेन्सका लागि २३५औं उपस्थिति थियो।
फाबियोले आफ्नो करिअर सन् १९९७ मा सुरु गरेका थिए, जुन वर्ष पिटर शिल्टनले सन्न्यास लिएका थिए। शिल्टनका अनुसार उनले एक ३८७ खेल खेलेका थिए भने गिनिज वर्ल्ड रेकर्ड्सले भने एक हजार ३९० खेल भएको जनाएको छ।
