काठमाडौं। नेपाली राष्ट्रिय महिला फुटबल टिमकी फरवार्ड सावित्रा भण्डारी (साम्बा)लाई समर्थन गर्दै अभिव्यक्ति दिएको भन्दै पूर्वप्रशिक्षक तथा खेलाडी कृष्ण थापालाई अखिल नेपाल फुटबल संघ (एन्फा) ले स्पष्टीकरण सोधेको छ।
एन्फा महासचिव किरण राईले मंगलबार उनलाई पत्र पठाउँदै सात दिनभित्र लिखित स्पष्टीकरण दिन निर्देशन दिएका हुन्। पत्रमा भनिएको छ, ‘पूर्वप्रशिक्षक तथा राष्ट्रिय टोलीका पूर्वखेलाडीको हैसियतमा दिइएको अभिव्यक्तिले महिला राष्ट्रिय टिममा साम्प्रदायिक भावना फैलाउने खतरा देखिएको छ।’
थापाले एक अन्तर्वार्तामा राष्ट्रको इज्जत प्रतिष्ठाभन्दा पनि व्यक्तिगत स्वार्थका लागि कप्तान नियुक्तिको विषयमा अनावश्यक विवाद निम्ताइएको धारणा व्यक्त गरेका थिए। उनले भनेका थिए,’’साम्बालाई कप्तान दिँदैमा उहाँहरूलाई टाउको दुख्ने कुरा हुन्छ? प्रशिक्षकले नै कप्तान नियुक्त गर्ने हो।’
उज्बेकिस्तानमा भएको एएफसी महिला एसियन कप छनोटमा कप्तानको विवाद सतहमा आएको थियो। सन् २०१९ देखि गोलकिपर अञ्जिला तुम्बाप्पो सुब्बाले कप्तानी गरिरहेकी थिइन्। तर, लाओससँगको पहिलो खेलमा उनी सुरुआती ११ मा नपरेपछि हेड अफ डेलिगेसन बनेर गएकी एन्फा केन्द्रीय सदस्यसमेत रहेकी सरिला श्रेष्ठले कप्तानी आर्मब्यान्ड मिडफिल्डर रेनुका नगरकोटीलाई लगाइदिएकी थिइन्।
एन्फाले प्लेइङ ११ सार्वजनिक गर्दा रेनुका कै नाम थियो। तर, पछि मैदान उत्रिँदा भने फरवार्ड साम्बाले कप्तानी आर्मब्यान्ड लगाएकी थिइन्। उक्त कुरामा थापाले आफ्नो धारणा राखेका हुन्।
उनले सार्वजनिक रूपमा कप्तान नियुक्तिलाई पदाधिकारी वा सदस्यको व्यक्तिगत स्वार्थसँग जोडेर अभिव्यक्ति दिँदा राष्ट्रिय महिला टिममा अनावश्यक विवाद सिर्जना भएको एन्फाको तर्क छ। त्यसैले सात दिनभित्र लिखित स्पष्टीकरण पेस गर्न निर्देशन दिएको छ।
पत्रमा भनिएको छ, ‘यस विषयमा तपाईँसँग भएको प्रमाणसहित किन र कति कारणले यस प्रकारको अभिव्यक्ति दिनुभएको हो? स्पष्ट पार्न आवश्यक छ। अन्यथा नेपालको प्रचलित कानुन बमोजिम प्रक्रिया अघि बढाइनेछ।’
पत्रमा थापाले लामो समयदेखि राष्ट्रिय खेलकुद परिषद्मार्फत प्रशिक्षक र मुख्य प्रशिक्षकको जिम्मेवारीसहित हाल गोल्डमेडलिष्टको रूपमा विशेष भत्तासमेत निरन्तर लिँदै आएको एन्फाले स्मरण गराएको छ।
उक्त पत्र राष्ट्रिय खेलकुद परिषद्का सदस्य–सचिवलाई समेत बोधार्थ पठाइएको छ। यस विषयले गर्दा एन्फाले थापाको खाइपाइ आएको भत्तासमेत रोक्ने प्रयास गरेको संकेत देखिन्छ।
