बार्सिलोनालाई नयाँ गोलरक्षक दर्ता गर्ने बाटो खुल्यो

काठमाडौं। बार्सिलोनाले नयाँ सिजनका लागि नयाँ गोलरक्षक जोआन गार्सियालाई दर्ता गर्न पाउने भएको छ। स्पेनिस लिगले मार्क–आन्द्रे टेर स्टेगनको चोट दीर्घकालीन भएको पुष्टि गरेपछि क्लबलाई उनी दर्ता गर्न सहज भएको हो।

क्लबका अनुसार लिगाको मेडिकल कमिटीले गोलरक्षक टेर स्टेगनको चोट वर्तमान नियमअनुसार दीर्घकालीन चोटको मापदण्ड पूरा गरेको ठहर गरेको छ। क्लबले बुधबारदेखि जोआन गार्सियाको दर्ता औपचारिक रूपमा अघि बढाउनेछ।

चोटको अवधिबारे टेर स्टेगन र क्लबबीच विवाद पनि भएको थियो। टेर स्टेगनले सुरुआत मेडिकल रिपोर्टमा हस्ताक्षर गर्न अस्वीकार गरेपछि क्लबले अनुशासनिक कारबाही खोलेर उनको कप्तानी हटाएको थियो। 

पछि उनले रिपोर्टमा हस्ताक्षर गरेपछि पुनः कप्तान बनाइयो। उनले भने,‘मैले बार्सिलोनालाई नयाँ खेलाडी दर्ता गर्न गाह्रो पार्ने उद्देश्य राखेको थिइनँ। मैले मात्र सकेसम्म चाँडो मैदानमा फर्किने चाहना राखेको थिएँ। यी पछिल्ला केही महिना मेरो लागि शारीरिक र व्यक्तिगत रूपमा निकै कठिन भएका थिए।’

टेर स्टेगनले गत सिजन प्रायः पूरा सिजन घुँडाको चोटका कारण गुमाएका थिए भने २०२३ मा अर्को कम्मरको अपरेशनका कारण करिब दुई महिना खेल्न सकेका थिएनन्। उनको अनुपस्थितिमा इन्की पेना र अनुभवी वोज्चिएक स्च्चेन्स्नीले खेलको सुरुआत गरेका थिए।

क्लबले जुन महिनामा एस्पान्योलका गोलरक्षक जोआन गार्सियालाई हस्ताक्षर गरेको थियो र अब उनलाई नयाँ सिजनका लागि दर्ता गरिनेछ।