काठमाडौं। म्यानचेस्टर सिटीका विंगर ज्याक ग्रिलिसले आफ्नो समस्याग्रस्त करियरलाई पुनर्जीवित गर्ने प्रयास गरेका छन्। उनी २०२५–२६ सिजनका लागि एभर्टनमा ऋणमा गएका छन्।
गत सिजन सिटीका प्रशिक्षक पेप ग्वार्डियोलासँग उनको सम्बन्ध बिग्रिएको थियो। प्रिमियर लिगमा उनले सात पटक मात्र सुरुआती ११ मा स्थान पाएका थिए।
२९ वर्षे ग्रिलिसलाई अमेरिकामा क्लब विश्व कपका लागि सिटीको टोलीमा समेत समावेश गरिएको थिएन। योसँगै उनी अब टोलीमा चाहिएको छैन भन्ने स्पष्ट सन्देश गएको थियो।
एभर्टनले ग्रिलिसलाई साप्ताहिक लगभग ३००,००० पाउन्ड (४०२,००० डलर) तलब दिने गरी अनुबन्ध गरेको छ। नयाँ प्रिमियर लिग सिजनको सुरुआत अगस्ट १८ मा लिड्सविरुद्ध हुनेछ।
ग्रिलिसले भने,‘म एभर्टनमा अनुबन्धित भएर निकै खुसी छु। यो मेरो लागि ठूलो कुरा हो। यो एक महान् क्लब हो, जहाँ महान् समर्थकहरू छन्।’ उनले एभर्टनमा नम्बर १८ जर्सी रोजेका छन्। यो क्लबमा खेल्दा वायन रुनी र पाउल ग्यास्कोइनले लगाउने नम्बर हो।
‘मेरो सबैभन्दा मनपर्ने दुई इङ्ग्लिस खेलाडी रूनी र पाउल ग्यास्कोइन हुन् र म जान्दछु उनीहरूले एभर्टनमा नम्बर १८ लगाउँथे। मैले यहाँ आउनुअघि रुनीसँग कुरा गरें र त्यो नम्बरबारे भनें। आशा गर्छु उनी पनि खुसी छन्,’ उनी भन्छन्।
ग्रिलिस २०२१ मा एस्टन भिल्लाबाट सिटीमा १०० मिलियन पाउन्डमा भित्रिएका थिए। त्यतिबेला यो रकम ब्रिटेनकै कीर्तिमानी थियो। उनले सिटीका लागि तीन प्रिमियर लिग, च्याम्पियन्स लिग र एफए कप जितिसकेका छन्। तर, २०२२–२३ को ट्रेबल जित्ने अभियानपछि उनको प्रदर्शन घट्न थालेको छ।
इङ्ल्यान्डको युरो २०२४ टोलीमा उनी समावेश नहुँदा उनलाई हृदयविदारक महसुस भएको थियो। ग्वार्डियोलाले गत सिजन ग्रिलिसलाई कम मात्र मौका दिएका थिए। एफए कप फाइनलमा क्रिस्टल प्यालेसविरुद्धको हारमा पनि उनी ज्यादै कम खेलमा मैदान उत्रिएका थिए।
उनको व्यक्तिगत जीवनमा पनि बारम्बार मदिरा सेवनसम्बन्धी गुनासो आइरहेको थियो। एभर्टनमा अनुबन्ध भएसँगै आफ्नो करियर सुधार्न र आगामी वर्षको विश्वकप अघि इङ्ल्यान्ड टोलीमा फिर्ता आउन मौका मिल्नेछ।
ग्रिलिसले भने,‘मेरो जाने एक ठाउँ मात्रै थियो। त्यसैले मैले प्रशिक्षकसँग कुरा गरेर निर्णय लिएको हुँ। सोसल मिडियामा एभर्टन समर्थकहरूले धेरै सन्देश पठाएका छन्, त्यसैले त्यो पनि कारण हो कि मैले एभर्टन रोजेको हुँ।’
एभर्टनले सिजन अघि गुडिसन पार्क छोडिसकेको छ। अब नयाँ हिल डिकिन्सन स्टेडियम प्रयोग गर्नेछ। यहाँ ग्रिलिस मुख्य खेलाडीका रूपमा देखिनेछन्।
प्रशिक्षक डेविड मोयसका लागि यो सिजनको सबैभन्दा ठूलो साइनिङ मानिन्छ। उनले यो समरमा धेरै ठूलो रकम खर्च गरेका थिएनन्। मोयसले भने, ‘हामी ज्याकलाई एभर्टनमा स्वागत गर्छौं र उनी यहाँ हुनुमा धेरै खुसी छौं।’
-1755092689.JPG)
