साफबाट भारत र बंगलादेशले मात्रै यु–२० एसियन कप खेल्ने

काठमाडौं। दक्षिण एसियाली फुटबल महासंघ (साफ)का दुई राष्ट्रले मात्रै एएफसी महिला यु–२० एसियन कप खेल्ने भएका छन्।

आइतबार सम्पन्न छनोटमा समूह ‘डी’बाट भारत र ‘एच’  बाट बंगलादेशले थाइल्यान्डमा अर्को वर्ष आयोजना हुने प्रतियोगितामा छनोट भएका हुन्।

साफबाट यी दुईसहित नेपाल र भुटानले मात्रै सहभागिता जनाएका थिए। तीमध्ये भारत र बंगलादेश मात्रै छनोट हुन सफल भएका हुन्। समूह ‘ए’मा रहेका नेपाल र भुटान भने समूह चरणबाटै बाहिरिए।

नेपाल आफ्नो समूहको उपविजेता बन्यो। उसले भुटानसँग १–१ को बराबरी र साउदी अरबमाथि १–० को जित हात पार्‍यो। १ अंक जोडेको भुटान भने तेस्रो स्थानम सीमित रह्यो।

भारत समूह ‘डी’को विजेता बन्दै सिधै प्रतियोगितामा प्रवेश गर्‍यो। भारतले दुई जित र एक बराबरीको नतिजा ल्यायो। अन्तिम खेलमा दक्षिण कोरियासँग ६–१ ले पराजित भएको बंगलादेश भने आफ्नो समूहको उपविजेता बन्दै एसियन कपमा छनोट भयो।

योसँगै एसियन कप खेल्ने १२ वटै टोलीको टुंगो लागेको छ। उत्तर कोरिया, भियतनाम, अस्ट्रेलिया, भारत, चीन, जापान, उज्बेकिस्तान र दक्षिण कोरिया आ–आफ्नो समूहको विजेता बन्दै एसियन कपमा पुगे।

जोर्डन उत्कृष्ट उपविजेता, बंगलादेश दोस्रो उत्कृष्ट उपविजेता र चाइनिज ताइपेई तेस्रो उत्कृष्ट उपविजेता टोली बन्न सफल भयो। 

थाइल्यान्ड भने आयोजकको नाताले पहिला नै छनोट भइसकेको थियो।