काठमाडौं। दक्षिण एसियाली महिला फुटबलमा उदाउँदै गरेको शक्ति बंगलादेशले इतिहास रचेको छ।
पहिलोपटक एएफसी महिला यु–२० एसियन कपमा स्थान बनाउँदै बंगलादेशी यु–२० महिला टोलीले आफ्नो नाम महादेशीय मञ्चमा पुर्याएको छ।
लाओसमा सम्पन्न छनोट प्रतियोगिताको समूह ‘एच’ अन्तर्गत बंगलादेशले उत्कृष्ट प्रदर्शन गर्दै यो उपलब्धि हासिल गरेको हो। इङ्लिस प्रशिक्षक पीटर बटलरको नेतृत्वमा टोलीले सुरुआती दुई खेलमा घरेलु टोली लाओस र टिमोर–लेस्टेलाई हराउँदै सानदार प्रदर्शन गर्यो।
तर, अन्तिम खेलमा दुईपल्टको च्याम्पियन दक्षिण कोरियासँग ६–१ को हारले बंगलादेशको अभियान रोकिएला जस्तो देखिएको थियो। यद्यपि, अन्य समूहका नतिजाले बंगलादेशलाई उत्कृष्ट उपविजेताको रूपमा शीर्ष ११ भित्र प्रवेश गराउँदै थाइल्यान्डमा हुने २०२६ एएफसी महिला यु–२० एसियन कपको फाइनल चरणको टिकट दिलाइदियो।
यो उपलब्धि बंगलादेशका लागि मात्र होइन, दक्षिण एसियाली महिला फुटबलका लागि पनि ऐतिहासिक मानिन्छ। पिटर बटलरको प्रशिक्षकत्वमा बंगलादेशले हालसम्म शतप्रतिशत सफलता पाइरहेको छ। सिनियर टिम र यु–२० दुवै स्तरमा साफ च्याम्पियन बन्नुका साथै एएफसी महिला एसियन कप र एएफसी यु–२० महिला एसियन कपका लागि छनोटमा सफल भइसकेका छन्।
अब बंगलादेश यु–२० टोलीको लक्ष्य थाइल्यान्डमा हुने फाइनल चरणमा उत्कृष्ट प्रदर्शन गर्दै एसियाकै बलिया टोलीहरूसँग प्रतिस्पर्धा गर्नु हुनेछ। यो यात्रा जित र हारको मात्र होइन, अनुशासन र सामूहिक मिहिनेतको प्रमाण हो। यसले बंगलादेश महिला फुटबलको भविष्यलाई अझ उज्यालो बनाएको छ।
