च्याम्पियन्स लिग विजेता पेरिस सेन्ट–जर्मेन (पीएसजी) ले शनिबार लिलबाट गोलकिपर लुकास शेभालिएलाई पाँच वर्षको सम्झौतामा अनुबन्ध गरेको छ। जियानलुइजी डोनारुम्माको भविष्यबारे बढ्दो अनिश्चितता बढेपछि क्लबले उनलाई अनुबन्ध गरेको हो।
पीएसजीले २३ वर्षीय शेभालिएका लागि करिब ४० मिलियन युरो (४६.५ मिलियन अमेरिकी डलर) तिरेको छ। भविष्यमा बोनससहित ५५ मिलियन युरोसम्म पुग्न सक्छ।
गत सिजन च्याम्पियन्स लिगमा लिलका लागि उनले उत्कृष्ट प्रदर्शन गरेका थिए। उनले रियल मड्रिड, एट्लेटिको मड्रिड र युभेन्ट्सविरुद्धको खेलमा प्रभाव पारेका थिए। विशेष गरी दुषान भ्लाहोभिचको एक जबरजस्त प्रहार बचाउन उनले गरेको प्रयासमा स्वयं स्ट्राइकरले पनि ताली बजाएका थिए।
लिलको युथ एकेडेमीमा हुर्किएका उनले उत्तरी फ्रान्सेली क्लबका लागि १२७ खेल खेलेका छन्। उनको आगमनले डोनारुम्माको प्रस्थानको संकेत दिन सक्छ।
यदि प्रशिक्षक लुइस एन्रिकले शेभालिएलाई पहिलो रोजाइमा राखे भने २६ वर्षीय इटालियन स्टारले दोस्रो नम्बरको भूमिका स्वीकार्ने सम्भावना कम देखिन्छ।
गत सिजन डोनारुम्मा युरोपकै उत्कृष्ट गोलकिपरमध्ये एक मानिएका थिए। उनले नकआउट चरणमा सानदार बचाउ गर्दै पीएसजीलाई च्याम्पियन्स लिग जिताउन महत्त्वपूर्ण भूमिका खेलेका थिए। तर, अनुबन्धमा मात्र एक वर्ष बाँकी रहँदा उनले नयाँ सम्झौतामा हस्ताक्षर गर्न अस्वीकार गरेका छन्।
क्लबले किलियन एमबाप्पे जस्तै अन्तिम वर्षमा नि:शुल्क जान दिने जोखिम लिन चाहँदैन। पीएसजीसँग अहिले मातभेई साफोनोभ, आर्नाउ टेनास र १९ वर्षीय रेनाटो मार्टिन ब्याकअप गोलकिपर छन्। पाँच गोलकिपरको टोली व्यवस्थापन गर्न कठिन हुने भएकाले यो समरमा सम्भवतः दुई खेलाडीले क्लब छोड्नुपर्ने देखिन्छ।
डोनारुम्मा पनि २०२१ मा इटालीलाई युरोपियन च्याम्पियन बनाउने क्रममा उत्कृष्ट प्रदर्शन गरेर पीएसजी आएपछि त्यस्तै अवस्थामा थिए। उनले त्यसबेला केयलोर नभासलाई प्रतिस्थापन गरेका थिए। नभासले त्यसअघि उत्कृष्ट प्रदर्शन गर्दै आएका थिए।
पीएसीले आगामी लिग अभियानको सुरुआत अगस्ट १७ मा नान्टेसविरुद्ध गर्नेछ।
-1754843967.webp)
