अमेरिकी क्लब लस एन्जलसमा पुगे सन

काठमाडौं। दक्षिण कोरियाका सुपरस्टार स्ट्राइकर सन ह्युङ-मिनले मंगलबार अमेरिकी मेजर लिग सकर (एमएलएस) क्लब लस एन्जलस एफसी (एलएएफसी) सँग सम्झौता गरेका छन्। 

१० वर्ष टोटनह्याममा खेलेपछि उनी एमएलएसको चर्चित क्लबमा आबद्ध भएका हुन्।

३३ वर्षे सनले टोटनह्याम छाड्ने निर्णय औपचारिक रूपमा सार्वजनिक गरेको तीन दिनपछि एलएएफसीसँग सम्झौता गरेका हुन्।

उनले मंगलबार राति बीएमओ स्टेडियममा टिग्रेसविरुद्धको लिग्स कप खेल पनि हेरेका थिए।  बुधबार हुने पत्रकार सम्मेलनमा उनलाई औपचारिक रूपमा सार्वजनिक गरिनेछ।

एलएएफसीले उनलाई भित्र्याउन २० मिलियन डलरभन्दा बढी स्थानान्तरण शुल्क तिरेको बताइएको छ, जुन एमएलएस इतिहासमै अहिलेसम्मकै सबैभन्दा ठूलो हुनसक्ने अनुमान गरिएको छ।