काठमाडौं। लिभरपुलले आफ्ना घरेलु मिडफिल्डर टायलर मोर्टनलाई फ्रेन्च क्लब लियोनमा १ करोड ५० लाख युरो (झण्डै १७ मिलियन अमेरिकी डलर) सम्मको मूल्यमा बेचेको छ।
लियोनले मंगलबार यो स्थानान्तरणको पुष्टि गरेको हो। २२ वर्षे मोर्टनले लियोनसँग पाँच वर्षको सम्झौता गरेका छन्। लियोनले सुरुआती १ करोड युरो तिरेको र थप ५० लाख युरो बोनसको रुपमा तिर्ने व्यवस्था रहेको बताइएको छ।
७ वर्षको उमेरदेखि लिभरपुलको युथ एकेडेमीमा आबद्ध भएका मोर्टनले गत सिजन लिभरपुलका लागि जम्मा पाँच खेल मात्र खेलेका थिए।
उनले सन् २०२१ मा पहिलोपटक लिभरपुलको मुख्य टोलीबाट खेल्ने मौका पाएका थिए। त्यसपछि उनलाई ब्ल्याकबर्न र हल सिटीमा लोनमा पठाइएको थियो।
भर्खरै सम्पन्न युरोपेली यु–२१ च्याम्पियनसिपमा मोर्टनले इङ्ल्यान्डलाई उपाधि जिताउन योगदान दिएका थिए। लिभरपुलले यो गर्मीयाममा धेरै खर्च गरेको छ।
हालै साइन गरेको हुगो एकीटिके मात्र नभई क्लबको कुल खर्च करिब ३४२ मिलियन डलर पुगेको छ। वित्तीय सन्तुलनका लागि केही खेलाडी बेच्नुपर्ने दबाबबीच लिभरपुलले लुइस डियाजलाई बायर्न म्युनिखलाई बेचेर करिब ८७ मिलियन डलर पाउनेछ।
जरेल क्वान्साहको बायर लेभरकुजेन सरेको स्थानान्तरणबाट पनि करिब ४७ मिलियन डलर क्लबको खातामा आउनेछ। लियोनलाई आर्थिक समस्याका कारण एक समय लिग १ बाट झारिएको थियो।
तर, क्लबले अपिल जितेपछि उनी आगामी सिजन पनि फ्रान्सको शीर्ष डिभिजन लिग १ मै खेल्नेछन्।
