काठमाडौं। एएफसी महिला च्याम्पियन्स लिगको प्रारम्भिक चरण खेल्न लागेको विभागीय टोली एपिएफले मुख्य प्रशिक्षकको जिम्मा चेतन घिमिरेलाई दिएको छ।
‘ए’ लाइसेन्न प्राप्त ३७ वर्षीय चेतन राष्ट्रिय टोलीका पूर्वसहायक प्रशिक्षक हुन्। नेपाल पुलिस क्लबबाट सन् २००७ देखि २०१४ सम्म घरेलु लिग खेलेको स्ट्राइकर पछिल्लो समय पुलिसलाई प्रशिक्षण गर्दै आएका थिए।
उनले सहिद स्मारक ‘ए’ डिभिजन लिग २०८० को मध्यतिर रेलिगेसन जोनमा पुगिसकेको पुलिसलाई उकास्दै तेस्रो स्थानमा पुर्याउन महत्त्वपूर्ण भूमिका खेलेका थिए।
उनी अर्ल्बेटो भिन्सेन्जो एनिस र नवीन न्यौपाने मुख्य प्रशिक्षक हुँदा सहायक प्रशिक्षकको भूमिकामा टोलीमा थिए। एपिएफले गत संस्करण पनि मलेसियामा प्रारम्भिक चरणको छनोट खेलेको थियो।
उक्त टोली राजेन्द्र तामाङले सम्हालेका थिए। तर, उज्बेकिस्तानको नासाफ र घरेलु टोली सबाहसँग भिडेको एपिएफ जितविहीन रहँदै १ अंकसहित समूह चरणबाटै बाहिरिएको थियो।
उक्त टोलीले नासाफसँग १–० को हार बेहोरेको थियो। सबाहसँग भने गोलरहित बराबरी खेलेको थियो। यसपल्ट भने एपिएफ बलियो टोली निर्माणमा लागेको छ। एपिएफले अर्को विभागीय प्रतिद्धन्द्धी क्लबबाट दुई डिफेन्डर समीक्षा घिमिरे र विमला विकलाई अनुबन्ध गरिसकेको छ।
समीक्षा नेपाल पुलिस क्लबबाट घरेलु फुटबल खेल्दै आएकी थिइन्। विमला भने त्रिभुवन आर्मी क्लबमा थिइन्। यसपटक एपिएफ समूह ‘बी’ मा छ।
यो समूहमा एपिएफसँगै थाइल्यान्डको कलेज अफ एसियन स्कलर, उज्बेकिस्तानको पिएफसी नासाफ र साउदी अरबको अल–नास्सर छन्। यो समूहको खेल उज्बेकिस्तानमा हुनेछ।
एपिएफले गत संस्करणमा पनि प्रारम्भिक छनोट खेलेको थियो। पहिलो खेलमा मलेसियाको सबाह एफसीलाई गोलरहित बराबरीमा रोकेको थियो। दोस्रो खेलमा भने नासाफसँग १–० ले पराजित हुँदै प्रतियोगिताबाट बाहिरिएको थियो।
यसपल्ट वरीयातामा तल्लो स्थानमा रहेका १९ टोलीले प्रारम्भिक छनोट खेल्नेछन्। यी १९ टोलीलाई ५ समूहमा विभाजन गरिएको छ। ४ समूहमा ४–४ टोली छन्। एक समूह ‘ई’ मा भने ३ टोली छन्। प्रत्येक समूहका विजेता मात्रै मुख्य प्रतियोगितामा प्रवेश गर्नेछन्।
