काठमाडौं। कप्तान लिओनल मेसी सुरुआती मिनेटमै घाइते भएर बाहिरिए पनि इन्टर मियामीले आइतबार बिहान लिग्स कपमा मेक्सिकन क्लब नेकाख्सामाथि रोमाञ्चक जित हात पारेको छ।
निर्णायक पेनाल्टी लुइस सुवारेजले जाली चुमाउँदा मियामीले ५–४ को जित निकाल्यो। खेलको अन्तिम समयसम्म २–१ ले पछि परेको मियामीलाई जोर्डी आल्बाले दोस्रो हाफको इन्जुरी समयमा हेडरमार्फत गोल गर्दै २–२ को बराबरीमा ल्याए।
त्यसपछि टाइब्रेकरमा पुगेको खेलमा मियामीका सबै पाँच पेनाल्टी सफल हुँदा गोलरक्षक रोक्को रियस नोभोले तेस्रो राउन्डमा टोमास बाडालोनीको प्रहार रोकिदिए।
तर, खेलको सबभन्दा ठूलो चिन्ताको विषय मेसीको चोट रह्यो। खेलको आठौं मिनेटतिर दुई डिफेन्डरसँगको टकरावमा मेसी घाइते भए। केहीबेरपछि उनले मैदानमै बस्दै चिकित्सकको सहायता लिए र ११औं मिनेटमै मैदान छोडे।
खेलपछि प्रशिक्षक जेभियर मास्चेरानोले मेसीलाई गम्भीर चोट नलागेको जस्तो देखिए पनि दायाँ तीघ्रा केही तानिएको महसुस भएको बताए।
‘उनले कुनै तीव्र पीडा नभएको तर केही तानिएको महसुस गरेका छन्,’ मास्चेरानोले अनुवादकमार्फत भने, ‘अब आइतबार परीक्षणपछि मात्रै चोटको गम्भीरता थाहा हुन्छ।’
खेलको सुरुआतमै म्याक्सी फाल्कोनलाई रातो कार्ड देखाइएपछि मियामी १० खेलाडीमा समेटिएको थियो। ६०औं मिनेटमा नेकाख्साका क्रिस्टियन काल्डेरोन दोस्रो पहेँलो कार्ड पाएपछि दुवै टोली १०–१० खेलाडीमै समेटिए।
मेसीको बाहिरिएसँगै नयाँ खेलाडी रोड्रिगो डे पउलको पासमा टेलास्को सेगोभियाले पहिलो गोल गर्दै मियामीलाई अग्रता दिलाए। तर, ३३औं मिनेटमा बाडालोनीले गोल फर्काउँदै नेकाख्सालाई बराबरीमा ल्याए।
८१औं मिनेटमा रिकार्डो मोन्रियलले गोल गर्दै नेकाख्सालाई अग्रता दिलाए पनि जोर्डी आल्बाले अन्त्यतिर डे पउलकै फ्रिकिकमा हेडरमार्फत गोल गरे।
यस प्रतियोगितामा मियामीले आफ्नो पहिलो दुई खेल जितेको छ। यो जितपछि मियामी ५ अंकसहित एमएलएस तालिकाको शीर्ष स्थानमा पुगेको छ। यद्यपि, नकआउट चरणमा पुग्न तीन खेलपछि एमएलएस र लिगा एमएक्स दुवैबाट शीर्ष ४ टोली मात्र अघिल्लो चरणमा पुग्ने छन्।
अब मेसीको चोट कत्तिको गम्भीर छ भन्ने कुराले आगामी खेलमा उनको सहभागिता निर्धारण गर्नेछ।
