घाइते भए मेसी
काठमाडौं। इन्टर मियामीका कप्तान लिओनल मेसी आइतबार बिहान मेक्सिकन क्लब नेकाक्साविरुद्धको लिग्स कप खेलको सुरुआतमै घाइते भएपछि मैदानबाट बाहिरिए।
खेलको आठौं मिनेटमा दुई डिफेन्डरको बीचमा पेनाल्टी क्षेत्रतिर दौडिरहँदा मेसी लडेका हुन्। लडेपछि उनले रिसमा मुठ्ठीले भुइँमा हाने र खेल जारी रहँदा मिडफिल्ड क्षेत्रतिर हिँड्न थाले।
त्यसपछि उनी मियामीको बेन्चनजिकै बसेर आफ्नो दायाँ तिघ्राको माथिल्लो भागमा ट्रेनरहरूसँग उपचार गराउँदै करिब दुई मिनेट बिताए। ११औं मिनेटमा उनलाई फेडेरिको रेडोन्डोले प्रतिस्थापन गरे र मेसी सिधै लकर रूमतिर लागे।
उनी बाहिरिएको केही मिनेटमै टेलास्को सेगोभियाले रोड्रिगो डे पउलको असिस्टमा गोल गर्दै इन्टर मियामीलाई १–० को अग्रता दिलाए। मेसीले आफ्नो करिअरभर थुप्रै पटक ह्यामस्ट्रिङको चोट भोगेका छन्।
पछिल्लो केही सिजनमा पनि उनले विभिन्न खुट्टासम्बन्धी चोटका कारण खेल गुमाएका थिए। हालैको चोट बायाँ एडडक्टरमा थियो। त्यसका कारण उनले यसै वर्ष अर्जेन्टिनाको विश्वकप छनोटका दुई खेल गुमाएका थिए।
अबको केही दिनमा उनको चोटबारे थप परीक्षण हुने अनुमान छ। सामान्यतया यस्ता मांसपेशीसम्बन्धी चोटका लागि एमआरआई स्क्यान गरिन्छ। तर, अहिलेसम्म उनको एमआरआई कहिले गरिन्छ भन्ने जानकारी आएको छैन।
मियामीले सन् २०२३ मा मेसीको आगमनपछि लिग्स कप जितेको थियो। तर, यस वर्षको संस्करणमा नकआउट चरण पुग्नका लागि क्लबले पर्याप्त गोल गर्दै एमएलएसको शीर्ष चारभित्र पर्नैपर्छ।
बुधबार एटलासविरुद्धको पहिलो खेल २–१ ले जित्दा मेसीले दुई असिस्ट गरेका थिए। तर, गोलअन्तरका आधारमा मियामी हाल एमएलएसको लिग्स कप तालिकामा नवौं स्थानमा छ।
