काठमाडौं। इङ्लिस प्रिमियर लिग क्लब टोटनह्यामका कप्तान सन ह्याङ–मिनले क्लबसँगको १० वर्ष लामो सहकार्य यस समर सिजनमा अन्त्य हुने घोषणा गरेका छन्।
दक्षिण कोरियाको राजधानी सिओलमा शनिबार आयोजित पत्रकार सम्मेलनमा उनले क्लब छाड्ने निर्णय आफ्नो करियरकै सबैभन्दा कठिन भएको भन्दै भावुक रुपमा जानकारी दिएका हुन्। क्लबले उनको निर्णयमा समर्थन जनाइरहेको पनि उनले बताए।
टोटनह्यामले आइतबार सिओलमै न्युक्यासल युनाइटेडविरुद्ध प्रि-सिजन मैत्रीपूर्ण खेल खेल्नेछ, जुन सम्भवतः सनको अन्तिम खेल हुनसक्छ।
सनले पत्रकार सम्मेलन सुरु गर्नुअघि भने, ‘म यस समरमा क्लब छोड्ने निर्णयमा पुगेको छु भन्ने जानकारी सबैसँग सेयर गर्न चाहन्छु। क्लबले मेरो निर्णयलाई सम्मान गर्दै मलाई सहयोग गरिरहेको छ।’
उनले स्मरण गरे, ‘जब म २३ वर्षको उमेरमा उत्तर लन्डन आएँ, म एक जवान थिएँ। मैले अङ्ग्रेजी बोल्न पनि जान्दैनथ्यो। आज म एक परिपक्व पुरुषको रूपमा यो क्लबबाट बिदा लिँदैछु, जुन मेरो लागि गर्वको क्षण हो।’
सनले टोटनह्यामका समर्थकप्रति धन्यवाद दिँदै भने, ‘म सबै समर्थकहरूलाई धन्यवाद दिन चाहन्छु जसले मलाई अत्याधिक माया गरे। क्लब मेरो घरजस्तै लाग्थ्यो। यो निर्णय सायदै मेरो जीवनको सबैभन्दा कठिन निर्णयमध्ये एक हो। तर, मलाई लाग्छ यो निर्णय लिने उपयुक्त समय हो।’
सनले आगामी वर्ष उत्तर अमेरिका हुने विश्वकपमा दक्षिण कोरियाका लागि खेल्नेछन्। तर, अब यही क्लबको जर्सीमा देखिने भन्नेबारे उनीसँग यकिन उत्तर भने छैन।
टोटनह्यामबाट ४५४ प्रतिस्पर्धात्मक खेलमा १७३ गोल गरेका ३३ वर्षीय सनलाई २०२३ मा प्रशिक्षक एन्जे पोस्टेकोग्लुले कप्तान नियुक्त गरेका थिए।
मे महिनामा टोटनह्यामले म्यानचेस्टर युनाइटेडलाई हराउँदै युरोपा लिगको उपाधि जित्दा उनी टोलीका महत्त्वपूर्ण सदस्य थिए। क्लबका लागि यो सन् २००८ पछि पहिलो ठूलो उपाधि हो।
‘म उपाधि जित्न चाहन्थें, त्यसका लागि दबाब थियो,’ उनले उपाधि जितेपछि भनेका थिए,‘मैले सात दिनसम्म हरेक रात यो खेलको सपना देखेको थिएँ। अब म शान्त मनले सुत्न सक्छु।’
सनले क्लबको पछिल्लो सफलताले पनि आफूमा नयाँ वातावरण र चुनौती खोज्ने चाहना बढाएको बताए। उनी भन्छन्, ‘युरोपा लिग जितेपछि लाग्यो मैले यहाँ जे सकिने थियो, त्यो सब गरिसकेको छु।’
उनको नाम अमेरिकी मेजर लिग साकर र केही साउदी अरबका क्लबहरूसँग जोडिँदै आएको छ। तर, उनले अझै कुनै निर्णय नगरेको बताए।
