बारामा अन्तर्राष्ट्रिय आमन्त्रण महिला फुटबल प्रतियोगिता हुने

निजगढ। बारामा अन्तर्राष्ट्रिय आमन्त्रण महिला फुटबल प्रतियोगिता आयोजना हुने भएको छ। बाराको जितपुरसिमरास्थित सिमरा भेट्रान क्लबले शनिबार पत्रकार सम्मेलनको आयोजना गरी प्रतियोगिताबारे जानकारी गराएको हो।

जितपुरसिमरास्थित सिमरा रंगशालामा सञ्चालन हुने प्रतियोगिता भाद्र २१ गतेदेखि २८ गतेसम्म चल्नेछ। प्रतियोगितामा नेपाल र भारतका विभिन्न ८ वटा टिमको सहभागिता रहने आयोजकले जनाएको छ। 

आयोजक सिमरा भेट्रान क्लब बारा, मोरङ जिल्ला फुटबल संघ, नेपाल एपिएफ क्लब, नेपाल आर्मी क्लब, नेपाल पुलिस क्लब, रौतहट जिल्ला फुटबल संघ, धरान सिटी फुटबल क्लब सुनसरी र खरसाङ गर्ल्स फुटबल एकेडेमी दार्जिलिङ भारतले प्रतिस्पर्धा गर्नेछ।

प्रतियोगिताको विजेता टोलीले ५ लाख रुपैयाँ प्राप्त गर्नेछ भने उपविजेताले २ लाख ५० हजार रुपैयाँ हात पार्नेछ। प्रत्येक खेलको प्लेयर अफ द म्याचले ५ हजार रुपैयाँ प्राप्त गर्नेछन्। 

प्रतियोगितामा विधागत रूपमा उत्कृष्ट प्रदर्शन गर्ने खेलाडीहरूले समेत नगद प्राप्त गर्नेछन्। प्रतियोगिताको उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्डर, उत्कृष्ट फरवार्ड र उत्कृष्ट प्रशिक्षकले जनही १० हजार रुपैयाँ प्राप्त गर्नेछन्।
 
प्रतियोगिता अवधिभरि सर्वोत्कृष्ट प्रदर्शन गर्ने खेलाडीले एक लाख रुपैयाँ प्राप्त गर्नेछन्। सिमरा रंगशालामा फ्लड लाइटमा सञ्चालन हुने प्रतियोगिताको टिकटदर १ सय रुपैयाँ तोकिएको आयोजकले जनाएको छ।

टिकटबाट प्राप्त हुने आम्दानी आयोजकले सामाजिक क्षेत्रमा सहयोग गर्ने जनाएको छ। टिकटबाट संकलित रकममार्फत वृद्ध आश्रम, अपांगता भएका व्यक्ती र महिला फुटबल क्लबहरूलाई सहयोग गरिने आयोजकले जनाएको छ।