एसियन कपमा छनोट हुने लक्ष्यसहित भुटान उड्यो नेपाली टोली
काठमाडौं। एएफसी महिला यु–२० एसियन कपमा छनोट हुने लक्ष्यसहित नेपाली टोली भुटान प्रस्थान गरेको छ।
भुटानको राजधानी थिम्पुमा हुने प्रतियोगिता अगस्ट ६ देखि ११ (साउन २१–२७) सम्म हुनेछ। सोही प्रतियोगिताका लागि नेपाली टोली बिहीबार त्यतर्फ प्रस्थान गरेको हो।
नेपाल समूह ‘बी’ मा छ। यो समूहमा साबिक विजेता उत्तर कोरिया, साउदी अरब र आयोजक भुटान रहेका छन्।
नेपालको लक्ष्य भने उत्तर कोरियालाई बराबरीमा रोकेकर एसियन कपमा पुग्ने रहेको कप्तान बिर्सना चौधरीले बताइन्। उनी भन्छिन्, ‘साफमा डिफेन्समा राम्रो गर्न सकेनौं। तर, यसपल्ट त्यो गल्तीलाई सुधार गरेर एसियन कपमा छनोट हुने लक्ष्य लिएका छौं।’
केही दिनअघि मात्रै बंगलादेशमा सम्पन्न साफ महिला यु–२० च्याम्पियनसिपमा नेपाल उपविजेता बनेको थियो। पहिलोपल्ट उपाधि जित्ने लक्ष्यसाथ ढाका पुगे पनि नेपालले त्यो अनुसार खेल प्रदर्शन गर्न सकेन।
भुटानलाई ६–१ र ८–० तथा श्रीलंकालाई दुईपल्ट समान ७–० ले पराजित गरेको नेपालले दुवै खेलमा घरेलु टोलीसँग ३–२ र ४–० को हार बेहोर्यो। ती दुई खेलमा डिफेन्स लाइनको कमजोरी प्रष्ट देखिएको थियो।
त्यसैले अहिले काम गर्नुपर्ने डिफेन्स लाइनमा रहेको चौधरीले बताइन्। उनी भन्छिन्, ‘अगाडि त हाम्रो एकदमै राम्रो छ। अब त्यस्तो हेरेको पनि छैन खेलेको पनि छैन तर उत्तर कोरियाविरुद्ध मैदानमै खेल देखाउँछौं।’
समूहको सबैभन्दा बलियो प्रतिद्वन्द्वी उत्तर कोरिया हो, जसले तीनपल्ट यु–२० विश्वकप र दुईपल्ट एसिनय कप जितिसकेको छ।
गत वर्ष यो टोलीले रुसमा विश्वकप र उज्बेकिस्तानमा एसियन कपको उपाधि उचालेको थियो। ती दुवै प्रतियोगिताको फाइनलमा उत्तर कोरियाले जापानलाई नै पाखा लगाएको हो। छनोटका बाँकीका दुई टोली भने नेपालका लागि सहज हुनेछन्।
नेपालले साफ महिला यु–२० च्याम्पियनसिपमा भुटानलाई ६–१ र ८–० ले पराजित गरिसकेको छ। अर्कोतर्फ साउदी अरब भुटानभन्दा पनि कमजोर टोली हो। यो टोलीलाई भुटानले साफ खेल्न जानुअघिको अभ्यास खेलमा दुईपल्ट फराकिलो गोलअन्तरले पराजित गरेको थियो।
हरेक समूहको शीर्ष स्थानमा रहने टोलीले एसियन कप खेल्न सिधै थाइल्यान्ड जाने टिकट पक्का गर्नेछन्।
