काठमाडौं। नाटकीय खेल, अर्को पेनाल्टी सुटआउट र कहिल्यै हार नमान्ने जुझारूपन। इङ्ल्यान्डले महिला युरोपियन च्याम्पियनसिप २०२५ को उपाधि आफ्नो शैलीमा पुनः जितेको छ।
आइतबार भएको फाइनलमा विश्व च्याम्पियन स्पेनलाई पेनाल्टी सुटआउटमा ३-१ ले पराजित गर्दै इङ्ल्यान्डले उपाधि रक्षा गरेको हो। निर्धारित समय र अतिरिक्त समयपछि खेल १–१ को बराबरीमा टुंगिएको थियो।
निर्णायक पेनाल्टी क्लोइ केली नायक बनिन्। उनले जबरजस्त रूपमा जाली चुमाउँदै इङ्ल्यान्डलाई जित दिलाइन्। यसअघि सेमिफाइनल र २०२२ को फाइनलमा पनि उनले निर्णायक गोल गरेकी थिइन्।
‘म शान्त थिएँ। आत्मविश्वास थियो र थाहा थियो गोल हुन्छ,’ केलीले भनिन्।
गोलकिपर हाना ह्याम्पटनले स्पेनका मरिओना काल्देन्ते र आइताना बोनमाटीका पेनाल्टी रोकिन्। अर्की खेलाडी सल्मा परालुएलोको पेनाल्टी बाहिर गयो।
इङ्ल्यान्डका प्रशिक्षक सरिना विएगम्यानले यस युरो कपलाई सबैभन्दा अराजक प्रतियोगिता भनेकी छन्। उनी युरोको तीन संस्करण लगातार जित्ने पहिलो प्रशिक्षक बनेकी छन्। उनले यसअघि सन् २०१७ , २०२२ र यो उपाधि जितेकी थिइन्।
‘मैले आफैं पनि विश्वास गर्न सकिरहेको छैन, यो कसरी सम्भव भयो?’ उनले भनिन्, ‘हामी आज राति पार्टी गर्नेछौं।’
