काठमाडौं। इङ्ल्यान्डका पूर्वकप्तान जो रुटले भारतविरुद्धको चौथो टेस्टमा अविश्वसनीय १५० रन बनाए।
योसँगै उनी टेस्ट क्रिकेटको सबैभन्दा धेरै रन बनाउने सूचीमा दोस्रो स्थानमा उक्लिएका छन्। तर, उनको मुख्य ध्यान कीर्तिमान बनाउनुभन्दा पनि इङ्ल्यान्डलाई जित दिलाउनेतर्फ नै केन्द्रित छ।
ओल्ड ट्राफोर्डमा शुक्रबारको ब्याटिङ प्रदर्शनसँगै उनी राहुल द्रविड, ज्याक कालिस र रिकी पन्टिङलाई उछिन्दै दोस्रो स्थानमा उक्लिएका हुन्। अब उनका अगाडि भारतका महान् ब्याट्सम्यान सचिन तेन्दुलकर मात्रै छन्, जसको नाममा १५ हजार ९२१ रन छन्। रुटले हालसम्म १३ हजार ४०९ रन बनाइसकेका छन्।
३४ वर्षीय रुटसँग अझै केही वर्ष खेल्न सक्छन्। त्यसैले उनले सचिनको कीर्तिमान तोड्न सक्ने सम्भावना पनि छ। तर, रुट आफैं चाहिँ यस्तो व्यक्तिगत कीर्तिमानभन्दा इङ्ल्यान्डको जितमा ध्यान केन्द्रित गरिरहन चाहन्छन्।
‘यी सबै कुरा सजिलै चासोको विषय बन्छन्, तर अन्ततः कुरा यो हो कि तपाईं भारतसँग खेल्दै हुनुहुन्छ, जुन सबैभन्दा ठूलो सिरिजमध्ये एक हो,’ रुटले स्काई स्पोर्ट्ससँग भने, ‘यो खेल मेरो कीर्तिमान बनाउन राखिएको हो। यो त जित्न र टिमलाई जितको स्थितिमा पुर्याउन राखिएको हो।’
तर, आफूले पछाडि पारेका केही खेलाडी सम्झिएर भने उनी भावुक बने। उनले भने, ‘जब म सानो थिएँ बगैँचा, सडक, आफ्नो क्लबमा खेल्दा यिनै ब्याट्सम्यानहरूको अनुकरण गर्ने गर्थें। अहिले उनीहरूकै पंक्तिमा आफ्नो नाम आउनु सपना जस्तै लाग्छ।’
कोरोना महामारीको समयलाई आत्ममूल्यांकनको अवसरका रूपमा लिएको उनी बताउँछन्। उनले भने, ‘त्यो समयमा म कप्तान थिएँ। मैले स्काईबाट आफ्ना आउट हुने तरिकाहरूको भिडियो मगाएर हेर्न थालेँ कि कुनै ट्रेन्ड छ कि। त्यसपछि म खेलप्रतिको दृष्टिकोण परिवर्तन गर्न थालेँ।’
उनले थपे,‘करियरको सुरुआतमा मेरो ध्यान प्राविधिक पक्षमा केन्द्रित थियो। तरऽ पछिल्लो चरणमा म जोखिम व्यवस्थापन र आउट हुने सम्भावना घटाउने उपायमा ध्यान दिन थालें। उद्देश्य धेरै रन बनाउने होइन, धेरै सुरक्षित तरिकाले बनाउने हो। कहिले काहीँ भावनामा बगेर आफैंलाई धेरै गार्हो बनाइन्छ या आफैंलाई धेरै दया गरिन्छ। म त्यस्तो अवस्थामा नपरोस् भन्ने चाहन्छु।’
रुटले सन् २०२१ यता ५ हजार ५८६ रन बनाइसकेका छन्, जसमा २१ शतक समावेश छन्। उनको औसत यस अवधिमा ५६.४२ रहेको छ। इङ्ल्यान्डअहिले पाँच खेलको सिरिजमा २–१ ले अघि छ। म्यानचेस्टरमा अन्तिम खेल जितेर सिरिज कब्जा गर्ने योजनामा छ।
