काठमाडौं। युवा तथा खेलकुदमन्त्री तेजुलाल चौधरीले नेपाल प्रिमियर लिग (एनपीएल) को दोस्रो संस्करण रोक्न आफ्नो संलग्नता नरहेको दाबी गरेका छन्।
शुक्रबार विज्ञप्ति जारी गर्दै उनले दोस्रो संस्करण नियमअनुसार आयोजक संस्था नेपाल क्रिकेट संघ (क्यान) बाटै सञ्चालन हुने अपेक्षा राखेको बताए। तर, उक्त संस्करण रवक्न आफ्नो संलग्नता रहेको भन्दै प्रचार गरिउकोप्रति दुखेसो पोखेका छन्।
‘एनपिएलको दोस्रो संस्करण नियमअनुसार आयोजक संस्थाबाटै सञ्चालन हुने अपेक्षा राखेको अवस्थामा सो संस्करण रोक्नका लागि मेरो संलग्नता भएको भनि प्रचार गरिनु गलत विषय हो,’ उनले भनेका छन्।
एनपिएलको पहिलो संस्करणमा आयोजक क्यानको आन्तरिक आर्थिक कारोबारलगायतका विषयलाई लिएर विषय उठिरहेको छ। अख्तियार दुरुपयोग अनुसन्धान आयोगमा गत फागुन १२ गते दर्ता उजुरी दर्ता भएको थियो। त्यसको दुई दिनपछि खेलकुदमन्त्री चौधरीले मन्त्रीस्तरीय निर्णय गर्दै एक कार्यदल गठन गरेका थिए।
अख्तियारमा उजुरी परेको विषय छानबिन गर्न पत्राचार भए बमोजिम नियमानुसार छानबिन कार्यदल गठन गरिएको उनले बताएका छन्। कार्यदलले प्रतिवेदन असार २५ गते बुझाइसकेको उनले दाबी गरेका छन्। बिहीबार मात्रै कार्यदलकी संयोजक रञ्जना प्रधानले पदबाट राजीनामा दिएकी थिइन्।
तर, उक्त विषयलाई अतिरञ्जित गर्ने कार्य भइरहेको चौधरीले दाबी गरेका छन्। तर, कार्यदलले बुझाएको प्रतिवेदन मन्त्रालयले अध्ययन गर्ने र कार्यान्वयनका लागि प्रक्रिया अगाडि बढाउने उनले जानकारी दिए।
‘एनपिएलको आगामी संस्करण निरन्तरताकै पक्षमा छानबिन कार्यदलको प्रतिवेदनमा समेत उल्लेख भएको अवस्थामा यस्ता गलत प्रचारले क्रिकेटप्रेमी आम जनसमुदाय, खेलाडी र प्रतिस्पर्धी टिमको मनोबल गिराउने भएकाले त्यस्तो किसिमको भूमिका नखेलि दिनु हुन सम्बद्ध सबैमा अनुरोध गर्दछु,’ उनले भनेका छन्।
खेल संघ/महासंघ भित्रको आर्थिक, प्रशासनिक गतिविधि पारदर्शी र प्रचलित कानुन नियमानुसार हुनुपर्ने उनले स्मरण पनि गराएका छन्।
