काठमाडौं। दक्षिण कोरियाको शीर्ष फुटबल लिग के लिगमा २६ वर्षदेखि रहँदै आएको विदेशी गोलकिपरको प्रतिबन्ध अन्त्य गरिएको छ।
अब सन् २०२६ सिजनदेखि विदेशी गोलकिपरले पनि के लिगमा खेल्न पाउने भएका छन्।
सन् १९९९ देखि लागू गरिएको यो नियमअनुसार के लिगमा मात्र कोरियन (घरेलु) गोलकिपरलाई खेल्ने अनुमति दिइएको थियो। त्यो बेला मात्र १० वटा प्रोफेसनल क्लब थिए। घरेलु प्रतिभालाई जोगाउने उद्देश्यले यस्तो निर्णय गरिएको थियो।
तर, हालै सोउलमा सम्पन्न बोर्ड बैठकपछि के लिगले एक विज्ञप्ति जारी गर्दै यो प्रतिबन्ध हटाएको घोषणा गरेको हो। अब शीर्ष दुई डिभिजनमा २६ वटा प्रोफेसनल क्लब रहेका छन्। विदेशी गोलकिपरको लागि पनि पर्याप्त स्थान रहेको बताइएको छ।
अहिलेको आधुनिक फुटबलमा अधिकांश टोलीमा तीन वा चार गोलकिपर हुने गर्छन्। त्यसैले अनुभवी गोलकिपरको अभाव देखिएको भन्दै चिन्ता पनि व्यक्त गरिएको छ।
यो निर्णयपछि अब के लिग जापान, साउदी अरेबिया र चीनजस्ता अन्य मुख्य एसियाली लिगसँग समान स्तरमा पुगेको छ।
