काठमाडौं। ब्राजिलियन स्ट्राइकर माथियस कुन्हाले भनेका छन्, म इतिहासकै खराब लिग सिजनपछि फेरि उचाइमा पुर्याउने लक्ष्यका साथ म्यानचेस्टर युनाइटेडमा अनुबन्ध भएको हुँ।
युनाइटेडको यो ट्रान्सफर सिजनको ठूला सम्झौतामार्फत भित्रिने उनी पहिलो खेलाडी हुन्। २० पटकको इङ्लिस च्याम्पियन युनाइटेड हाल रुबेन आमोरिमको नेतृत्वमा पुनर्निर्माण प्रक्रियामा छ।
क्लबले गत सिजन प्रिमियर लिगमा १५औं स्थानमा रहेर इतिहासकै खराब प्रदर्शन गर्यो। युरोपा लिगको फाइनलमा टोटनह्यामसँग हार बेहोरेपछि च्याम्पियन्स लिग खेल्ने अवसरसमेत गुमायो।
स्पेनको बिलबाओमा भएको पराजयपछि युनाइटेडले सन् २०१४/१५ यता पहिलो पटक युरोपेली फुटबल गुमाएको हो। तर, क्लबको समस्याले कुन्हालाई रोक्न सकेन।
उनी उल्भ्सबाट ६२.५ मिलियन पाउन्डमा युनाइटेडमा औपचारिकरूपमा अनुबन्ध भए। उनले गत सिजन सबै प्रतियोगितामा १७ गोल गरेका थिए। उल्भ्सको ‘प्लेयर अफ द सिजनसमेत घोषित भए।
२६ वर्षीय कुन्हाले भने,‘यो सबैभन्दा सामान्य वाक्य हो। तर, अहिलेको यो क्षणमा भन्नैपर्छ– यो मेरो सपना पूरा भएको हो।’ सायद बाहिरबाट धेरैले उनको यो निर्णयलाई बुझेका छैनन्। किनभने युनाइटेडको हाल खस्किँदै गएको छ। तर, यो कुराले उनलाई खासै फरक भने पार्दैन।
हुन त उनको मनमस्तिस्कमा युनाइटेडबाहेक अन्य कुनै क्लब पनि त छैन। ‘मलाई यो सिजन निकै कठिन रह्यो भन्ने थाहा छ। तर, सधैं युनाइटेडमा खेल्ने सपना देख्दै आएको छु। त्यसैले यो निर्णय सजिलो भयो। मेरो लागि युनाइटेडजस्तो क्लब अर्को कोही छैन,’ उनी भन्छन्।
यो निर्णयले नै उनी युनाइटेडलाई माया गर्छन् भन्ने स्पष्ट देखउँछ। बाल्यकालदेखि युनाइटेडलाई समर्थन गर्दै आएका कुन्हान वायन रुनी र २००८ को च्याम्पियन्स लिग जित्ने टोली आफ्नो प्रेरणा रहेको बताउँछन्। उनले क्लबको गौरवशाली इतिहास दोहोर्याउने लक्ष्यसमेत राखेका छन्।
‘युनाइटेड आउने कुनै पनि खेलाडीले क्लबका पुराना दिनहरू सम्झन्छ। प्रिमियर लिगका उपाधि, च्याम्पियन्स लिगको गौरव। म यही सोचेर यहाँ आएको हुँ कि युनाइटेड फेरि शीर्षमा पुग्न सक्छ। म यो क्लबलाई शीर्षमा पुर्याउने जिम्मा लिन्छु,’ उनले भने।
कुन्हाले यसै हप्ता भएको विश्वकप छनोटमा पनि ब्राजिललाई पाराग्वेमाथि १–० को जित दिलाउन भूमिका खेलेका थिए। उनले भिनिसियस जुनियरको गोलमा असिस्ट गरे।
उनको आगमनले युनाइटेडको आक्रमणमा र गोल गर्ने क्षमतामा सुधार हुने अपेक्षा गरिएको छ, जुन गत सिजन निकै कमजोर रहेको थियो।
