काठमाडौं। दुईपटकको प्रिमियर लिग ‘प्लेयर अफ द सिजन’ विजेता केभिन डि ब्रुएना बिहीबार इटालीको सिरी ‘ए’ च्याम्पियन क्लब नापोलीमा अनुबन्ध भएका छन्।
‘किङ केभ इज हियर’, नापोलीले एक्समा पोस्ट गर्दै उनको आगमनको घोषणा गर्यो।
३३ वर्षीय बेल्जियन मिडफिल्डरको म्यानचेस्टर सिटीसँगको सम्झौता सकिएको थियो। नापोलीले उनको नयाँ सम्झौतामा अवधि भने खुलाएको छैन।
रोमस्थित एक क्लिनिकमा मेडिकल जाँचका लागि पुगेका डि ब्रुएनालाई स्वागत गर्न करिब १५० समर्थक उपस्थित थिए। उनले भवनभित्र प्रवेश गरेपछि समर्थकहरूले उनको नाम लिएर नाराबाजी र नापोली च्याम्पियन भएको गीत पनि गाएका थिए।
नापोलीमा डि ब्रुएना आफ्नो देशका पुराना साथी रोमेलु लुकाकुसँग पुनः एकसाथ हुनेछन्। उनीहरू दुवै बेल्जियम राष्ट्रिय टोलीका सदस्य हुन्। साथै, नापोलीका पूर्व स्टार र बेल्जियमका दिग्गज ड्रिज मर्टेन्सको पाइला पछ्याउनेछन्।
मिडफिल्डमा उनले सिरी ‘ए’ प्लेयर अफ द इयर घोषित भएका स्कट म्याकटोमिनीसँग जोडी बाँध्नेछन्, जो म्यानचेस्टर युनाइटेडबाट नापोली आएपछि निकै सफल साबित भएका छन्।
डि ब्रुयना विश्व फुटबलकै सबैभन्दा ‘कम्प्लिट’ मिडफिल्डरमध्ये एक मानिन्छन्। उनले सन् २०१९–२० र २०२१–२२ मा प्रिमियर लिग ‘प्लेयर अफ द सिजन’ जितेका थिए।
म्यानचेस्टर सिटीमा १० वर्ष बिताएका उनले क्लबलाई ६ प्रिमियर लिग, २ एफए कप र पहिलो पटक च्याम्पियन्स लिग उपाधि जिताउन योगदान दिएका थिए।
उनको आगमन नै नापोलीका मुख्य प्रशिक्षक एन्टोनियो कोन्टेलाई फेरि क्लबमै बस्न राजी गराउने मुख्य कारण भएको बताइएको छ। कोन्टे केही समयअघि युभेन्ट्स फर्किने तयारीमा थिए।
1714555228.jpg)
-1749816939.jpeg)
