काठमाडौं। संयुक्त राज्य अमेरिकामा सुरु हुन लागेको फुटबलको सर्वोच्च निकाय फिफाको पहिलो बृहत् क्लब विश्वकपमा १ अर्ब अमेरिकी डलरको पुरस्कार राशि तोकिएको छ। तर, लिभरपुल, बार्सिलोना, आर्सनललगायत क्लब केही ठूला स्टार खेलाडी भने यो प्रतियोगिता गुमाउने छन्। योसँगै यो प्रतियोगिता केही रूपमा फिक्का हुने देखिएको छ।
मोहमद सलाह (लिभरपुल)
इङ्लिस प्रिमियर लिग जिते पनि लिभरपुल क्लब विश्वकपमा हुनेछैन, जटिल छनोट प्रणालीका कारण। त्यसैले प्रिमियर लिगमा २९ गोल र १८ असिस्ट गर्दै कीर्तिमान बनाएका इजिप्टका विंगर मोहमद सलाहले यो प्रतियोगिता गुमाउने छन्।
लामो र थकाइपूर्ण सिजनपछि केही विश्राम पाउँदा सलाहलाई दुःख नलाग्ला। उनले समुद्र किनारमा घाम तापेको फोटो इन्स्टाग्राममा पोस्ट गर्दै छुट्टीको मजा लिइरहेका छन्।
तर, अफ्रिकन फुटबलका एक आइकनका रूपमा रहेका सलाहले पेरिस सेन्ट–जर्मेन (पिएसजी) विरुद्धको सम्भावित पुनः भिडन्त गुमाउनु अफसोस भने पक्कै मान्नेछन्। त्यस्तै, लिभरपुलले यसै सिजन जर्मन क्लब बायर लेभरकुजेनबाट भित्र्याएको फ्लोरियन विराट्स पनि सहभागी हुने छैनन्। उनको टोली लेभरकुजेन क्लब विश्वकप खेल्न अयोग्य ठहरिएको छ।
लामिन यमल (बार्सिलोना)
सन् २०२४–२५ को सिजनमा विश्व फुटबलमा सबैभन्दा रोमाञ्चक प्रतिभा देखिएका १७ वर्षीय स्पेनिस विंगर लामिन यमल पनि अमेरिका जाने छैनन्। बार्सिलोनाले क्लब विश्वकपमा स्थान पाउन सकेन।
बालोन डि’ओरका सम्भावित दाबेदारमध्ये एक मानिएका यमलको ड्रिब्लिङ र साहसिक खेलले उनलाई नयाँ लिओनल मेसीको उपमा दिइएको छ। तर, उनले सम्भवतः अर्जेन्टिनी स्टार मेसीसँग खेल्ने एक मात्र अवसर गुमाएका छन्। मेसीको टोली इन्टर मियामीले भने प्रतियोगिता खेल्दै।
बार्सिलोनाका राफिन्हा, पेड्री र रोबर्ट लेवान्डोस्की पनि यस प्रतियोगितामा अनुपस्थित रहनेछन्।
क्रिस्टियानो रोनाल्डो (अल–नासर)
मेसीका पुरानो प्रतिद्वन्द्वी क्रिस्टियानो रोनाल्डो पनि अमेरिका जाने छैनन्। ४० वर्षीय पोर्चुगिज स्टार अहिले साउदी क्लब अल–नासरम आबद्द छन्।
फिफा अध्यक्ष जियानी इनफान्टिनोले रोनाल्डोलाई प्रतियोगितामा सहभागी गराउन केही क्लबसँग छलफल भइरहेको बताएका थिए। तर, रोनाल्डोले युरोपियन नेसन्स लिग जितेपछि भने, ‘केही क्लबहरूले सम्पर्क गरेका थिए। केही प्रस्ताव उपयुक्त थिए, केही थिएनन्। तर सबै सम्भावनालाई सम्हाल्न सकिन्न।’ योसँगै उनले अल–नासरमै रहने संकेत दिएका छन् भने क्लब विश्वकप नखेल्ने पक्का भइसकेको छ।
बुकायो साका (आर्सनल)
च्याम्पियन्स लिगको सेमिफाइनलमा पराजित भएपछि आर्सनलले सिजन उपाधिविहीन रहेर समाप्त गर्यो। आर्सनका लागि क्लब विश्वकप उपाधि जित्ने ठूलो मौका हुन सक्थ्यो, तर त्यो गुम्यो।
इंग्ल्यान्डका स्टार विंगर बुकायो साकाको एक मात्र क्लब उपाधि सन् २०२० को एफए कप हो। उनले पछिल्ला केही सिजनमा उच्च स्तरको प्रदर्शन गरे पनि उपाधिको संख्या भने बढाउन सकेका छैनन्।
लिभरपुल र म्यानचेस्टर सिटीसँग प्रतिस्पर्धा गरिरहेको आर्सनलले पनि ठूलो पुरस्कार राशि गुमाउने भएको छ।
नेयमार (सान्तोस)
साउदी क्लब अल–हिलालमा चोटग्रस्त बनेका नेयमार अहिले ब्राजिलियन क्लब सान्तोस फर्किएका छन्। उनी फिट भएर सन् २०२६ को विश्वकप खेल्ने तयारी गरिरहेका छन्।
३३ वर्षीय नेयमार अझै पनि विश्व फुटबलका सबैभन्दा चर्चित नामहरूमध्ये एक हुन्। तर, उनको अनुपस्थिति अमेरिका प्रतियोगिताको व्यावसायिक पक्षका लागि घाटा हुने देखिन्छ।
ब्राजिलका क्यासेमिरोले भनेका छन्, ‘मेरो फुटबल युगमा नेयमार, रोनाल्डो र मेसी शीर्ष तीनमा पर्छन्।’ टिकट बिक्रीमा संघर्ष गरिरहेका आयोजकहरूका लागि नेयमारको उपस्थिति ठूलो फाइदा हुने थियो।
